Da maraicen yau Litinin 8 ga watan nan, babban sakataren kwamitin kolin jam’iyyar kwaminis ta kasar Sin, kana shugaban kasar, Xi Jinping, ya tattauna tare da babban sakataren jam’iyyar kwadago ta Koriya kuma shugaban kasar Koriya ta Arewa, Kim Jong Un, a birnin Pyongyang na kasar Koriya ta Arewa.A tattaunawarsu, shugaba Xi ya ce, Sin da Koriya ta Arewa, dukkansu kasashe ne masu bin tsarin gurgurzu da ke karkashin jagorancin jam’iyyar kwaminis.
Ya ce dadadden zumuncin kasashen biyu ya samo asali ne daga akidu da ra’ayoyi da kuma burikansu iri daya, da zumuncin da ke da dogon tarihi da tubalin siyasa mai inganci gami da alaka ta kut da kut.
Kana, zumunta ta zuriya bayan zuriya, da al’umma mai makoma ta bai daya, da taimaka wa juna, su ne salon musamman na dangantakar Sin da Koriya ta Arewa.
Ya kara da cewa, duk da sauyawar halin da duniya take ciki, jam’iyyar kwaminis gami da gwamnatin kasar Sin ba za su canza matsayinsu na mayar da hankali sosai wajen inganta zumunci tsakanin kasashen biyu ba, kuma ba za su canza goyon-bayansu ga harkokin gurgurzu na Koriya ta Arewa da ke karkashin shugabancin Kim Jong Un ba, kana ba za su canza kudurinsu na kiyaye muradun kasashen biyu da managarcin yanayin da suke ciki bisa manyan tsare-tsare ba. Shugaba Xi ya kuma bayar da wasu muhimman shawarwari hudu game da bunkasa dangantakar kasarsa da Koriya ta Arewa.
Shi kuwa a nasa bangaren, Kim Jong Un ya ce, zabar Koriya ta Arewa a matsayin wuri na farko da shugaba Xi Jinping ya ziyarta a shekarar da muke ciki, ya shaida yadda kasar Sin take mayar da matukar hankali kan dangantakarta da Koriya ta Arewa, da kuma zumunci mai karfi da ke tsakaninsu, wanda ya karfafa wa Koriya ta Arewa gwiwa sosai.
Shugaba Kim ya ce, zai ci gaba da ayyana batun raya dangantakar kasashen biyu a matsayin babban sha’ani mafi muhimmanci bisa manyan tsare-tsare, da yin bakin kokari wajen raya dangantakar kasashen biyu har ta zama abar koyi ga dangantakar kasa da kasa, don bayar da gudummawa ga shimfida zaman lafiya da samar da ci gaba a duniya. (Murtala Zhang)
