Manyan kwamandojin ƙungiyar ta’addanci ta Ansaru guda biyu sun amsa laifukan da ake tuhumar su da su, waɗanda suka haɗa da ta’addanci da garkuwa da mutane domin neman kuɗin fansa, a gaban Babbar Kotun Tarayya da ke zama a Abuja.
Wadanda ake tuhumar, Mustapha Abdullahi (wanda aka fi sani da Al-Mustapha) da Alhaji Abdullahi (wanda aka fi sani da Malam Sabo), sun bayyana a gaban Mai Shari’a Emeka Nwite. Lokacin da aka karanta musu takardun tuhumar guda tara (9) da ke kunshe da zargin makarkashiya ta ta’addanci, da garkuwa da mutane, da kuma mallakar makamai ba bisa ƙa’ida ba, dukansu biyu sun amsa laifinsu ba tare da ɓata lokaci ba.
Harin Kan Jami’an Tsaro Da Garkuwa Da Mutane
Binciken da jami’an tsaro suka gabatar wa kotu ya nuna cewa waɗanda ake tuhumar sun jagoranci wasu hare-hare na ta’addanci a shiyyar Arewa maso Yamma da kuma hanyar Abuja zuwa Kaduna.
Daga cikin manyan laifukan da suka amsa sun haɗa da:
- Kisan wasu jami’an ‘yansanda guda biyu yayin wani hari na kwantan ɓauna da suka kai wa tawagar jami’an tsaro.
- Garkuwa da wani mashahurin ɗan kasuwa ɗan ƙasar waje tare da karbar zunzurutun kuɗi har ₦150 miliyan a matsayin kuɗin fansa kafin su sake shi.
- Gudanar da sansanonin horar da ‘yan ta’adda a cikin dajin Birnin Gwari da ke Jihar Kaduna, inda suke tara makamai masu tarin yawa.
Matakin Kotu Da Kuma Dage Shari’a
Bayan amsa laifin da waɗanda ake tuhumar suka yi, lauyan mai ƙara daga Ma’aikatar Shari’a ta Tarayya, Aishatu Ibrahim, ta buƙaci kotun da ta ɗage zama domin ba da damar gabatar da hujjoji daki-daki (review of facts) kafin kotu ta yanke musu hukuncin da ya dace da doka.
A gefe guda, lauyan da ke kare waɗanda ake tuhumar, Musa Ahmed, bai nuna wata tirjiya ga wannan buƙata ta masu ƙara ba, tun da wanda yake karewa sun zaɓi faɗin gaskiya ta hanyar amsa laifukansu.
Sakamakon haka, Mai Shari’a Emeka Nwite ya ba da umarnin a ci gaba da tsare Mustapha Abdullahi da Alhaji Abdullahi a gidan yarin da ke Kuje (Kuje Correctional Centre). Kotun ta ɗage sauraron shari’ar zuwa ranar 28 ga watan Satumba, 2026 domin gabatar da hujjoji na ƙarshe da kuma yanke hukunci.
