ICPC ta shigar da tuhume-tuhume guda huɗu a gaban kotu kan Farfesa Bello Abubakar, babban likitan da ke ba da shawara kan cutar daji (oncology consultant) a Asibitin Kasa da ke Abuja, wanda kuma shi ne likitan tsohon Gwamnan Jihar Kaduna, Nasir El-Rufai.
Hukumar ICPC ta zargi Farfesa Abubakar da laifin ƙirƙirar jabun rahoton lafiya mai taken “Medical Report and Expert Opinion for Urgent Medical Intervention” mai kofin kwanan wata 10 ga watan Yuni, 2026. Ana zargin cewa an yi amfani da wannan rahoton ne domin yaudarar jami’an shari’a da nufin neman bayar da belin tsohon gwamnan a kan hujjojin rashin lafiya, a wata shari’a mai lamba KDH/KAD/ICPC/02/2026 da ke gaban Babbar Kotun Jihar Kaduna.
Kudaden Da Ake Tuhuma Da Kuma Hujjojin Asibiti
A cikin takardun tuhumar da aka shigar, hukumar ICPC ta bayyana cewa likitan ya fitar da rahoton ne ba tare da gudanar da sahihin binciken lafiya da ya dace a kan Nasir El-Rufai ba, sannan ya mika wa iyalan tsohon gwamnan rahoton don gabatarwa ga gaban kotu.
Babban Kalubalen da ya taso shi ne bayanin Shugaban Gudanarwa na Asibitin Kasa (CMD), Dokta Raji Mahmud, wanda ake sa ran zai shaida wa kotu cewa asibitin ba shi da masaniya kan wannan rahoto kuma ba su bayyar da ikon fitar da shi ba. Haka kuma, binciken da aka yi a tsarin adana bayanan marasa lafiya na na’ura mai kwakwalwa (Electronic Medical Records) na asibitin a farkon watan Yuni 2026 ya nuna babu sunan El-Rufai a matsayin majiyyaci mai rijista a lokacin. Sabanin kwanakin baya da Farfesa Abubakar ya bayyana cewa ya duba El-Rufai sau da dama, takardun asibitin sun nuna an yi masa rajista ne kawai a ranar 7 ga Yuli, 2026.
Daki-Dakin Tuhume-Tuhume 4
- Tuhuma ta Farko: Bayar da labarin karya da nufin yaudarar jami’in gwamnati ko na shari’a, wanda hakan ya saba wa sashi na 17(1)(c) na Dokar ICPC ta shekarar 2000.
- Tuhuma ta Biyu: Amfani da matsayi na ma’aikacin lafiya ko mai ba da shawara domin ba da fifiko ta hanyar fitar da rahoton bogi, wanda ya saba wa sashi na 19 na Dokar ICPC.
- Tuhuma ta Uku: Hadin baki da wani mai suna Aliyu Bala domin karkatar da bayanai ta hanyar rantsuwar takarda (affidavit) don neman beli, wanda hakan ya saba da sashi na 79 na Dokar Hukuncin Manyan Laifuka (Penal Code).
- Tuhuma ta Hudu: Kirkirar jabun takarda da gangan da gabatar da ita a matsayin takarda mai dauke tambarin Asibitin Kasa na Abuja, alhali ya sani cewa asibitin bai amince da ita ba, wanda hakan ya saba da sashi na 362 da 364 na Dokar Penal Code.
Wannan takaddama ta samo asali ne tun a ranar 7 ga Yuli, 2026, lokacin da ICPC ta kama Farfesa Abubakar bayan wasu hotuna sun bayyana a shafukan sada zumunta (musamman Facebook). Hotunan sun nuna tsohon gwamna El-Rufai yana tattaunawa da abokan harkarsa na siyasa, ciki har da Isa Ashiru Kudan, a daidai lokacin da kotu ta ba da damar a kai shi asibiti don duba lafiyarsa kawai. Hukumar ICPC ta bayyana cewa an yi amfani da damar duba lafiyar wajen gudanar da harkokin siyasa da suka saba wa umarnin kotu.
A gefe guda, iyalan El-Rufai ta bakin dansa, Mohammed El-Rufai, sun zargi hukumar da tauye wa mahaifinsu hakkinsa na samun abinci da kulawar lafiya yayin da yake tsare. El-Rufai yana fuskantar tuhume-tuhume da suka shafi badakalar kudi da cin amanar kasa a lokacin da yake gwamnan Kaduna tsakanin 2015 zuwa 2023, zargin da ya musanta tare da bayyana shi a matsayin bita-da-kulli na siyasa.
