Kamfanin Simintin Dangote, Obajana, ya gudanar da bikin Ranar Matasa ta Duniya, tare da sake jaddada ƙudirinsa na bunƙasa matasa ta hanyar shirye-shiryen karfafawa daban-daban, da kuma ƙara tasirinsa mai kyau ga al’umma.
A cikin wata sanarwa da Sashen Hulɗa da Jama’a na kamfanin ya fitar, an ce sama da mutum 100 ne suka halarci taron, waɗanda suka haɗa da jakadun masu nasara, masu koyon aikin digiri, masu koyon aikin gudanarwa, ƴan bautar ƙasa (NYSC) da sauran baƙin da aka gayyata.
Sanarwar ta ce taron ya zama wata dama ga matasa wajen gabatar da sabbin dabaru, musayar ilimi da kuma duba hanyoyin magance matsalolin da suka shafi ɗorewar muhalli da wuraren aiki.
Gabatarwar da aka yi a taron ta shafi batutuwa daban-daban, daga sake sarrafa shara da kare muhalli zuwa hanyoyin da fasaha ke samarwa, ciki har da amfani da jirage marasa matuƙi (drones) domin inganta tsaro a ayyukan haƙar ma’adanai.
Da yake jawabi a wajen taron, Shugaban Sashen Kula da Ma’aikata (HAM) da Gudanarwa, Mista Adeniyi Azeez, ya yaba wa mahalarta bisa ƙirƙire-ƙirƙirensu da himmarsu.
Ya ƙarfafa wa matasan gwiwa da su ci gaba da bunƙasa ƙwarewarsu, rungumar ƙirƙire-ƙirƙire, da kuma amfani da damar da za ta taimaka wajen ci gabansu da bunƙasa sana’o’insu.
Shi ma Shugaban Sashen Ayyukan Jin Daɗin Al’umma, Mista Ademola Adeyemi, ya jaddada muhimmancin shigar matasa cikin ƙoƙarin samar da makoma mai ɗorewa.
Ya buƙkaci matasa da su ci gaba da nuna kishin kare muhalli, ci gaban al’umma da shugabanci nagari, yana mai cewa dabarun da ake samarwa a yau na iya zama mafita mai tasiri gobe.
Shirin ya ƙunshi gabatar da sabbin dabaru, gabatarwa kan ɗorewar muhalli, waƙoƙin baka, nishaɗin kiɗa, wasanni da kuma zaman tattaunawa da suka sa mahalarta suka kasance cikin nishaɗi da sha’awa a tsawon taron.
An kuma nuna wani faifan bidiyo da ya ƙunshi ayyukan bikin Ranar Matasa ta Duniya da aka gudanar a baya, wanda ya zaburar da mahalarta tare da ƙara nuna musu muhimmancin rawar matasa wajen samar da sauyi mai kyau.
Mahalarta taron sun bayyana bikin a matsayin mai ƙayatarwa da kuma tasiri, inda suka ce ya taimaka wajen ƙara musu ƙwarin gwiwa, ƙwarewar magana a gaban jama’a da kuma ƙudurin tallafawa shirye-shiryen kare muhalli da ɗorewa a cikin al’ummominsu.
Sanarwar ta ce nasarar bikin Ranar Matasa ta Duniya ta shekarar 2026 ta nuna ƙudurin kamfanin Simintin Dangote na ƙarfafa matasa, bunƙasa ƙirƙire-ƙirƙire da kuma tabbataccen ci gaba mai.
Ta ƙara da cewa taron ya nuna cewa idan aka bai wa matasa ingantaccen dandali da kwarin gwiwa, za su iya samar da hanyoyin magance matsaloli a aikace, tare da zama masu bayar da gudummawa wajen samar da tabbatacciya makoma.
