Aƙalla mutane 22, ciki har da sojoji huɗu, ne aka kashe bayan ’yan bindiga sun yi wa wasu mutane kwanton ɓauna a hanyar Gwashi zuwa Nasarawa, a Ƙaramar Hukumar Bukkuyum ta Jihar Zamfara. Haka kuma, mazauna ƙauyuka uku a yankin Dansadau sun tsere daga matsugunansu sakamakon wasu hare-hare daban-daban.
Rahotanni sun ce maharan sun kuma ƙaƙaba wa al’ummomin yankin Dansadau harajin naira miliyan 50, bayan sun ƙona motoci 12 tare da fatattakar mazauna ƙauyuka uku.
Ɗan Majalisar Dokokin Jihar Zamfara mai wakiltar Bukkuyum, Hon. Hamisu Faru, ya tabbatar da faruwar harin, inda ya ce an kai wa waɗanda abin ya shafa hari ne ranar Lahadi, lokacin da sojojin ke bakin aiki a yankin.
Ya ce har zuwa lokacin da ake haɗa wannan rahoto, ba a gano gawarwakin wasu daga cikin waɗanda aka kashe ba.
Jami’in Yaɗa Labarai na ‘Operation Fansan Yamma’, Laftanar Kanal Aliyu Danja, shi ma ya tabbatar wa jaridar LEADERSHIP da mutuwar sojojin a wata tattaunawa ta musamman da aka yi da shi a safiyar Litinin.
A wani harin daban da aka kai a yankin Dansadau, rahotanni sun ce fiye da mazauna yankin 300 ne suka rasa matsugunansu bayan ’yan bindiga sun kai hare-hare kan ƙauyuka uku, sun ƙona motoci 12 tare da kakaba wa al’ummomin harajin ₦50m.
A wani ɓangare kuma, reshen jam’iyyar NDC na Jihar Zamfara ya yi Allah-wadai da hare-haren, yana mai bayyana cewa matsalar tsaro a jihar na ƙara taɓarɓarewa.
A cikin wata sanarwa da aka fitar ranar Lahadi, wadda Sakataren Yaɗa Labarai na jam’iyyar, Kassim Almustapha Kayatawa, ya sanya wa hannu, jam’iyyar ta jajantawa iyalan waɗanda suka mutu, ciki har da sojojin da suka rasa rayukansu.
