‘Yan majalisar wakilai guda uku da suka fito daga jihar Katsina, sun sauya sheka daga jam’iyyar APC zuwa jam’iyyar PDP.
‘Yan majalisar sun hada da Dan majalisar tarayya mai wakiltar mazabar Katsina ta tsakiya Hon. Salisu Iro Isansi da Dan majalisa mai wakiltar mazabar Safana da Danmusa da Batsari sai kuma Hon. Ahmed Dayyabu Safana, mai wakiltar Batagarawa/Rimi/Charanchi.
- PDP Ta Karɓe Ofisoshin Yaƙin Zaɓen Buhari A Katsina
- ‘Yan APC Dubu 5,000 Sun Sauya Sheƙa Zuwa PDP A Katsina
Hon. Hamza Dalhat, ya sanar da sauya shekar su zuwa PDP, an karbe su a Jam’iyyar yayin wani gangamin yakin neman zaben shugaban kasa da dan takarar shugaban kasa na jam’iyyar, Atiku Abubakar, ya yi a jihar Sokoto.
Hakazalika, dan takarar gwamna na jam’iyyar PDP a jihar Katsina, Sanata Yakubu Lado Danmarke, ya kuma bayyana ficewar wasu jiga-jigan jam’iyyar APC a karamar hukumar Kurfi ta jihar zuwa jam’iyyar PDP.
Danmarke ya karbi bakuncin Hon. Bishir Lawal da Dahiru Maradi wanda ake kira da Baba Dahe, tare da magoya bayan jam’iyyar PDP sama da 9,390 a ranar Litinin.
Don haka ya baiwa al’umar Kurfi tabbacin aniyarsa ta samar da tsaro, ayyukan yi da inganta tattalin arzikin jihar Katsina, inda ya bukace su da su zabi jam’iyyar PDP a zaben 2023 mai zuwa.
