‘Yan Sanda a jihar Osun sun bindige dan Jarida mai suna Toba Adedeji da ke aiki da gidan Jaridar The Nation a yayin da wasu fusatattun matasa ke gudanar da zanga-zanga a mahadar ababen hawa ta Olaiya da ke yankin Osogbo.
An harbi Toba ne a kafarsa ta hagu, inda kuma aka harbi wasu takwarorinsa biyu a Lokacin zanga-zangar da ta barke kan zargin da matasan suka yi na kashe masu wani dalibi mai suna Abiola Afolabi.
Afolabi, wanda aka bizne a makabartar da ke yankin Ilesa, an bindige shi ne bisa zargin shi da damfara a kafar Yanar Gizo.
An ruwaito cewa, ‘yan Sandan dauke da bindigu, sun dira a inda aka yi zanga-zangar ne suka fara yin harbi da jefa Barkonon Tsohuwa inda harsashin ya samu ‘yan Jaridun a yayin da suke gudanar da aikinsu.
Tuni dai, aka garzaya da Adedeji da sauran zuwa Asibitin kwararru na Osun da ke a yankin Ogbobo
