Yayin da duniya ke fuskantar yanayi na rashin tabbas, da manyan sauye-sauye a yanayin cudanyar cinikayya tsakanin kasa da kasa, wadanda ke haifar da koma baya, da tafiyar hawainiya a wasu sassa na kasuwancin duniya, a daya hannun harkokin tattalin arziki a kasar Sin na bunkasa yadda ya kamata.
Wasu alkaluman baya bayan nan da mahukuntan kasar Sin suka fitar, sun nuna yadda a watan Mayu da ya gabata, hada-hadar fitar da hajoji zuwa kasashen waje daga Sin ta karu da kaso 19.4 bisa dari kan na shekarar da ta gabata, kuma adadin ya dara kaso 14.1 da aka samu a watan Afirilun bana. Wani abun da manazarta suka bayyana mamakinsa ma shi ne yadda addadin hada-hadar shigo da hajoji cikin kasar ya dara na fitar da su, inda alkaluman suka nuna karuwar shigo da hajojin zuwa kaso 27.4 bisa dari a watan Mayu, sama da kaso 25.3 da aka samu a watan Afirilu.
Bugu da kari, fadadar harkokin cinikayyar kasar ya kai kaso 16.9 bisa dari, inda darajarsa a duk wata cikin watsanni uku a jere, ke kaiwa sama da kudin Sin yuan tiriliyan hudu, kwatankwacin dalar Amurka biliyan 587. Kuma da wannan sakamako, karuwar jimillar ci gaban cinikayyar kasar Sin cikin watanni biyar na farkon shekarar bana ya kai kaso 15.3 bisa dari.Irin wannan ci gaba ya saba da tunanin wasu sassan yammacin duniya dake kallon kasar Sin a matsayin mai dogaro kacokan kan fitar da hajoji fiye da kima zuwa kasashen ketare.
Maimakon haka, alkaluman sun shaida yadda ci gaban fannin cinikayya, da hada-hadar raya tattalin arzikin kasar Sin ke tafiya bisa daidaito, da inganci da kuma goyayya mai tsafta.Ko shakka babu, wannan ba batu ne dake nuna karuwar adadin hajoji da Sin ke fitarwa ba ne kadai, maimakon haka batu ne dake shaida irin ci gaba da kasar ke samu ta fuskar shige da ficen kayayyaki, da hidimomi da duniya ke bukata, a yayin da akasarin manyan kasashe masu wadata ke fadi-tashin cimma irin wannan sakamako.
Har ila yau, nasarorin da Sin din ta cimma a fannin shige da ficen hajoji, tare da kasashe musamman masu tasowa, na nuni ga nasarar cudanyar abokan cinikayya masu cimma moriyar juna.
Don haka, fatanmu a nan shi ne kamar yadda kasar Sin ke kara aiwatar da managartan manufofin bunkasa alakar cinikayya, sauran manyan kasashe masu arziki ma za su rungumi tsarin cudanya mai karko, mai kunshe da kirkire-kirkire da game dukkanin sassan kasa da kasa. Irin wanda zai rika haifar da moriyar bai daya da bunkasar tattalin arzikin duniya baki daya. (Saminu Alhassan)
