Rundunar ‘yansanda ta jihar Katsina ta ce, jami’anta, sun hallaka dan bindiga daya a wata artabu a karamar hukumar Jibiya da ke jihar.
A cikin sanarwar da kakakin rundunar jihar SP Gambo Isah ya fitar ta ce, wasu da dama daga cikin ‘yan bindigar da artabun ta rutsa da su, sun tsira da kyar da harbin alburusai.
Lamarin wanda ya afku a ranar Lahadi da misalin karfe 4:30 na dare, ‘yan bindigar dauke da bindigu kirar AK-47, sun kai harin ne wani shingen duba ababen hawa na jami’an ‘yansanda da ke a mahadar Magama-Hirji daura da babban titin Jibia zuwa birnin Katsina.
Sanarwar ta kara da cewa, jami’an ‘yansandan sun kutsa cikin dajin domin bin sahun ‘yan bindigar da suka arce.
Jami’an ‘yansanda biyu sun samu raunuka inda a yanzu ake duba lafiyarsu a babban asibitin Jibiya.
Jami’an sun kuma samu nasarar kwato makamai daga hannun ‘yan bindigar ciki har da bindiga kirar AK-47 daya da alburusai da kudade da sauran kayayyaki.
