Yawan Mutanen Da Suka Sayi Inshorar Kula Da Tsoffi A Kasar Sin Ya Zarce Biliyan 1.07 

Ma’aikatar kula da jin dadin al’umma ta kasar Sin ta sanar da cewa, ya zuwa karshen watan Maris na bana, adadin al’ummar kasar da suka sayi hidimar inshora, ta bangarorin samar da kudin fensho ga tsoffi, da kula da mutane marasa aikin yi, da wadanda suka samu raunuka wajen aiki, sun kai biliyan 1 da miliyan 71, da miliyan 244, da kuma miliyan 297, adadin da suka karu da miliyan 4 da dubu 420, da miliyan 2 da dubu 560, gami da miliyan 2 da dubu 710, bisa na shekarar 2024 da ta gabata.

Ban da haka, ana ci gaba da kokarin gwajin manufar samar da hidimar inshorar kula da mutanen da suka ji rauni a wajen aiki ga mutanen da suke aiki a wasu sabbin sana’o’i. Inda aka ce, ya zuwa karshen watan Maris, yawan ma’aikata masu jigilar abinci, da direbobin motocin tasi masu karbar oda ta manhajojin wayar salula, da dai sauransu, da suka samu ishorar, ya zarce miliyan 11 da dubu 40.

• Mun Fara Shirin Lashe Firimiya Ta Gaba –Slot
• Ko Kin San… Yadda Ake Nagartaccen Tsumi?

Dangane da yawan kudin da aka samu, da kudin da aka kashe daga cikin asusun ishora, an ce cikin rubu’in farko na bana, asusun inshora na kula da tsoffi, da mutane marasa aikin yi, da wadanda suka samu raunuka wajen aiki, ya samu kudin da yawansa ya kai Yuan tiriliyan 2 da biliyan 360, kana an kashe kudin da yawansa ya kai Yuan tiriliyan 1 da biliyan 940, inda aikin asusun ya kasance tabbatacce.

A fannin kula da mutane masu karamin karfin tattalin arziki, da wadanda suka rasa aikin yi, a cikin rubu’in farko na bana, hukumomi masu kula da al’umma na kasar Sin sun samar da kudi ga mutane miliyan 8 da dubu 260, don su biya kudin inshorar kula da tsoffi a kai a kai. (Bello Wang)