Ƙungiyar haɗakar jam’iyyun adawa mai suna Coalition for Democracy ta zargi jam’iyyar APC mai mulki da ƙoƙarin taƙaita ƴancin siyasa da dimokuraɗiyya a Nijeriya, ta hanyar ƙirƙirar yanayin da zai bai wa jam’iyyar mai mulki fifiko tare da hana ƴan adawa gudanar da harkokinsu cikin ƴanci gabanin babban zaɓen ranar 16 ga Janairu, 2027.
Ƙungiyar ta bayyana hakan ne a cikin wata sanarwa da ta fitar bayan taron kwamitin shugabanninta da aka gudanar a Abuja ranar Laraba, 4 ga Nuwamba, 2026. Ta kuma sanar da sauya sunanta daga G100 Coalition zuwa Coalition for Democracy, tana mai cewa manufarta ita ce kare kundin tsarin mulki, da bin doka da kuma haƙƙoƙin siyasa na ƴan Nijeriya.
Ƙungiyar ta yi zargin cewa a cikin kwanaki 90 da suka gabata an kai hare-hare kan magoya bayan ƴan adawa a Kaduna, da Ibadan, da Sakkwato da Cross River. Ta kuma yi zargin cewa wasu otal-otal sun soke yarjejeniyar bai wa ƴan adawa wuraren gudanar da taro, an rufe wasu ofisoshin kamfen, an cire allunan tallan ƴan adawa a Jihar Edo, yayin da ake karɓar kuɗaɗe masu yawa daga jam’iyyun adawa domin tallan siyasa a Abuja.
Haka kuma, ƙungiyar ta nuna damuwa kan sahihancin kundin rajistar masu zaɓe na INEC, musamman bayan rahotannin gano hotunan da ake zargin an ƙirƙira da fasahar AI a cikin bayanan rajistar, da kuma cire bayanan rajista sama da miliyan 1.27. Ta buƙaci hukumar zaɓen ta gudanar da bincike mai zurfi kan kundin rajistar, ta wallafa sakamakon binciken kafin ranar 15 ga Disamba, tare da hukunta jami’an da aka samu da hannu wajen yin maguɗi.
Ƙungiyar ta kuma buƙaci Sufeto-Janar na Ƴansanda, Tunji Disu, da ya tabbatar da tsaron dukkan jam’iyyun siyasa ba tare da nuna bambanci ba, tare da bayyana sakamakon binciken hare-haren da aka kai wa magoya bayan ƴan adawa.
Ta ce ya zama wajibi hukumomin gwamnati su tabbatar da cewa dukkan jam’iyyun siyasa suna da damar gudanar da taruka da kamfen cikin ƴanci, domin bai wa ƴan Nijeriya damar zaɓar shugabanninsu yadda suke so.
