Wata Kotu a Jihar Kano ta bayar da umarnin tsare wasu jami’an sintiri biyu a gidan gyaran hali bisa zargin kashe wani matashi mai suna Umar Muhammad Bachirawa, bayan wani saɓani da ya shiga tsakaninsu kan batun kare.
An gurfanar da waɗanda ake zargin, Mas’udu Abdullahi Bachirawa da Kabiru Adamu Bachirawa, a gaban kotun da Mai Shari’a Garba Hamza Malafa ke jagoranta. Ƴansanda ne suka gabatar da ƙarar, inda suka zarge su da hannu wajen kisan Umar bayan taƙaddama kan kare.
A yayin zaman kotun, Lauyan masu gabatar da ƙara, Barista Awaisu Sani Lawan, ya buƙaci a karanta wa waɗanda ake zargin tuhume-tuhumen da ake yi musu. Bayan karanta tuhumar, mutanen biyu sun musanta aikata laifin.
Daga bisani, lauyan masu gabatar da ƙara ya nemi kotun ta ɗage shari’ar domin ya samu shawarar doka daga Ofishin Babban Lauyan Gwamnatin Jihar Kano. Kotun ta amince da buƙatar tare da bayar da umarnin tsare waɗanda ake zargin a gidan gyaran hali.
An ɗage ci gaba da sauraron shari’ar zuwa ranar 16 ga Disamba, 2026. Har yanzu dai waɗanda ake zargin ba su amsa laifin ba, kuma kotu ba ta yanke hukunci kan zargin da ake musu ba.
