Wasu ƴan bindiga da ake zargin masu garkuwa da mutane ne sun kashe wani mutum ɗaya tare da yin awon gaba da wasu mutanen da ba a tantance adadinsu ba, a wani sabon hari da suka kai a Jihar Kaduna.
Rahotanni sun bayyana cewa maharan sun mamaye yankin ne ɗauke da muggan makamai a cikin dare, inda suka riƙa harbi kan-mai-uwa-da-wabi domin tsorata mazauna garin, lamarin da ya yi sanadiyyar mutuwar mutumin nan take kafin suka kwashe sauran mutanen zuwa daji.
Wata majiya daga yankin ta bayyana cewa harin ya jefa al’ummar garin cikin matuƙar fargaba da ruɗani, inda mazauna da dama suka tsere daga gidajensu domin neman tsira, yayin da ƴan uwan waɗanda aka sace ke cikin zullumi da jiran tsammanin jin ta bakin maharan.
Bayan faruwar lamarin, an sanar da hukumomin tsaro inda aka tura ƙarin jami’an ƴansanda da sojoji zuwa yankin domin kwantar da tarzoma, tare da fara aikin bin sawun maharan da nufin ceto mutanen da aka sace cikin ƙoshin lafiya.
Mazauna yankin sun yi kira ga gwamnatin jihar da hukumomin tsaro da su ƙara ƙarfafa matakan tsaro a yankunan karkara da ke fuskantar hare-haren ƴan bindiga akai-akai, domin kare rayuka da dukiyoyin al’umma daga ci gaba da faɗawa hannun maharan.
