Wasu ‘yan bindiga sun yi garkuwa da shugaban Ƙaramar Hukumar Sapele a Jihar Delta, Bright Abeke, lamarin da ya sa jami’an ‘yansanda suka kulle hanyoyin shiga da fita a yankin domin farautar maharan.
Rahotanni sun nuna cewa an sace shi ne da misalin ƙarfe 7 na yammacin Juma’a a wani otel da ke kan titin Owumi a Sapele, yayin da maharan suka kai hari tare da yin harbe-harbe domin tsoratar da jama’a.
- INEC Na Yunƙurin Hana Mu Fitar Da Ƴan Takara – ADC
- Ziyarar Haɗin Kai: PDP Ƙarƙashin Turaki Ta Kai Ziyara Ga ADC Ƙarƙashin Mark
Shaidu sun ce kimanin mutane 15 dauke da makamai ne suka mamaye wurin, inda suka nufi shugaban kai tsaye kafin su tafi da shi cikin motoci, ciki har da Range Rover da wasu motoci biyu.
A yayin harin, an harbi wani jami’in ‘yan sa-kai mai suna Ufuoma, wanda aka garzaya da shi asibiti domin ceto rayuwarsa, yayin da rikici da fargaba suka mamaye yankin.
Wata majiya daga ‘yansanda ta tabbatar da cewa ana ci gaba da ƙoƙarin ceto shugaban cikin ƙoshin lafiya, tare da sanya ido kan hanyoyin shiga da fita a Sapele, tana mai cewa jami’an tsaro na ƙoƙarin cafke maharan da kuma dawo da zaman lafiya a yankin.
Discussion about this post