Mohammed Bello El-Rufai, ɗan tsohon gwamnan jihar Kaduna, Nasir El-Rufai, ya zargi ICPC da hana mahaifinsa damar ganin likitansa da kuma iyalansa yayin da yake tsare a hannun hukumar.
A wata sanarwa da ya fitar ranar Juma’a, Bello ya ce jami’an ICPC sun hana likitan mahaifinsa ganinsa duk da umarnin kotu da ya ba shi damar samun kulawar lafiya ba tare da takura ba. Ya ce likitan ya kai ziyara ofishin ICPC da misalin ƙarfe 3 na rana domin tattauna sakamakon gwaje-gwajen lafiya da aka yi wa tsohon gwamnan, amma aka hana shi shiga saboda wai sai shugaban ICPC ya bayar da izini.
Ya kuma yi zargin cewa matar El-Rufai, Aishatou El-Rufai, an hana ta shiga bayan ta kai masa abincin dare da misalin ƙarfe 7 na yamma, inda jami’an suka ce an hana karɓar abinci bayan ƙarfe 6:30 na yamma.
“Har yanzu ana tsare da mahaifinmu, Mallam Nasir El-Rufai, a hannun ICPC,” in ji Bello, yana mai bayyana matakin a matsayin “cin zarafin dokar ƙasa kai tsaye.” Ya ce babu wani dalilin doka da zai sa a hana wanda ake tsare da shi ganin likita ko samun ganawa da iyalansa.
Ƙoƙarin jin ta bakin ICPC bai yi nasara ba kafin kammala wannan rahoto. Ana tuhumar El-Rufai ne da zargin almundahanar kuɗi da kuma sakin biliyoyin naira domin aiyukan da ake zargin ba a aiwatar da su ba, zarge-zargen da ya musanta.
