Wani ɗan takarar shugaban ƙasa a jam’iyyar Nigeria Democratic Congress (NDC), RMK, ya bayyana cewa ba zai janye takararsa domin goyon bayan ɗan takarar jam’iyyar African Democratic Congress (ADC) ko wata jam’iyya ba a zaɓen shugaban ƙasa mai zuwa.
RMK ya bayyana hakan ne yayin da yake sukar salon yaƙin neman zaɓen majalisar yaƙin neman zaɓen shugaban ƙasa ta ADC, inda ya zarge ta da kai hare-hare marasa amfani a kansa, ɗan takarar shugaban ƙasa na jam’iyyarsa, Peter Obi, da kuma jam’iyyar NDC.
A cikin wata sanarwa da ya fitar, RMK ya ce maimakon ADC ta mayar da hankali wajen bayyana ƙwarewa, amincin shugabanci da kuma cancantar ɗan takararta ga ’yan Nijeriya, ta fi mayar da hankali wajen ƙoƙarin ɓata sunan NDC da ’yan takararta.
Ya ce hakan ya haɗa da ƙoƙarin nuna cewa NDC tana aiki ne da jam’iyyar APC mai mulki, ko kuma za ta iya janye takararta a minti na ƙarshe domin marawa ɗan takarar ADC baya.
RMK ya bayyana cewa ya kamata majalisar yaƙin neman zaɓen ADC ta mayar da hankali wajen mayar da martani ga zarge-zargen da Mataimakin Shugaban Ƙasa, Kashim Shettima, ya yi wa ɗan takararta, maimakon kai hare-hare a kansa da Peter Obi.
Ba Za Mu Janye Takararmu Ba — RMK
RMK ya ce suna sane da yiwuwar ADC-PCC ta yaɗa bayanan da ba su da tushe a jajibirin zaɓe, domin yaudarar magoya bayan NDC da ikirarin cewa jam’iyyar za ta janye takararta domin goyon bayan ADC.
Ya bayyana cewa babu wata hujja ko dalili da zai sa su janye takararsu domin goyon bayan ADC ko wata jam’iyya.
“Ba za mu janye takararmu domin ADC ko wata jam’iyya ba. Muna da kwarin gwiwa kan ƙwarewarmu, cancantarmu da kuma shirye-shiryenmu na jagorantar Nijeriya,” in ji shi.
Ya kuma jaddada cewa tikitin takararsu na OK ba ya aiki da APC ko wakiltar wata daga cikin ’yan takararta, yana mai cewa duk wani ikirari da ke nuna akasin haka ba shi da tushe.
APC Ta Gagara, ADC Ba Ta Da Wata Mafita Mafi Kyau — RMK
RMK ya bayyana cewa gwamnatin APC ta gaza wajen biyan buƙatun ’yan Nijeriya, yana mai cewa ADC ma ba ta gabatar da wata mafita mafi kyau da za ta maye gurbin gwamnatin ba.
Ya ce tikitin OK ne yake ganin zai iya zama sahihin zaɓi ga ’yan Nijeriya, saboda ƙwarewa, tarihin ayyukan da aka cim ma, amincin shugabanci da kuma goyon bayan da yake samu daga yankunan Arewa da Kudu.
A cewarsa, tikitin OK na neman haɗa kan ’yan Nijeriya da kuma magance manyan matsalolin da ƙasar ke fuskanta, musamman ta fuskar tsaro, ilimi, noma, ababen more rayuwa, kiwon lafiya da tattalin arziki.
Ya bayyana tikitin a matsayin wanda zai taimaka wajen warkar da ɓangarorin da suka rarrabu a ƙasar, tare da samar da haɗin kai da ci gaba.
NDC Za Ta Iya Kalubalantar Jam’iyya Mai Mulki
RMK ya bayyana cewa NDC ce, a ganinsa, babbar jam’iyyar adawa mafi ƙarfi da za ta iya kalubalantar jam’iyyar da ke mulki a Nijeriya.
Saboda haka, ya yi kira ga magoya bayan jam’iyyar da sauran ’yan Nijeriya masu kishin ƙasa da su ci gaba da ƙoƙarin tabbatar da nasarar NDC a zaɓen mai zuwa.
Ya kammala sanarwar tasa da cewa: “Nijeriya za ta kasance lafiya.”
