A cikin ƙoƙarin da take ci gaba da yi, domin ƙara bunƙasa fannin aikin noma, Gwamnatin Jihar Taraba, ta ƙara sayo wasu manyan kayan aikin noma na zamani.
Babbar manufar ita ce, domin ƙara haɓaka fannin aikin noma a yankunan da ke karkara a ɗaukacin faɗin jihar baki-ɗaya.
Ta sayo kayan ne, a ƙarƙashin shirin bunƙasa noma a karkara wato, TAARDS.
Wasu daga cikin kayan sun haɗa da; taraktocin noma 30 tare da kayan yin feshi guda 40 da na yin girbi guda 30 da sauran makamatansu.
A cikin sanarwar da Kwamishiniyar Yaɗa Labarai da Wayar da Kan Jama’a ta jihar, Barista Zainab Usman Jalingo ta fitar, ta ce; za a tura kayan domin gudanar da ayyukan noma tare da tallafa wa noman rani a ɗaukacin faɗin jihar.
A cewar sanarwar, sayo kayan, na daga cikin ci gaba da ƙoƙarin da gwamnatin Gwamna Agbu Kefas ke yi, na ƙara samar da wadataccen abinci a jihar da samar wa da manoman karakara kayan aiki na zamani.
Sanawar ta ƙara da cewa, tun lokacin da gwamnatin jihar ta ƙiriƙiro da shirin na TAARDS, ta ci gaba da zuba jari a cikin tsarin aikin noma na jihar tare da ƙirƙiro da wasu shirye-shirye, domin ƙara haɓaka noma a karkara.
