An ƙaddamar da aikin Delimi RISE a Jihar Kaduna tare da tallafin Shirin Qarfafa Zaman Lafiya da Juriya a Nijeriya (SPRiNG), wanda Ofishin Birtaniya mai kula da Harkokin Waje, Commonwealth da Ci Gaban Kasa da Qasa (FCDO) ke daukar nauyi.
Kungiyar Engaging Borders SRD, wadda qungiya ce mai gudanar da ayyukan gina zaman lafiya a fadin Afirka da aka kafa a shekarar 2022, ce za ta aiwatar da shirin.Shirin na da nufin karfafa shigar matasa maza da mata cikin ayyukan gina zaman lafiya ta hanyar ba su damar taka muhimmiyar rawa, jagoranci da kuma tasiri a kananan hukumomin Igabi, Jema’a da Kaura na Jihar Kaduna.
Shirin zai shafi matasa 80 masu shekaru tsakanin 18 zuwa 35, inda za a fara da gudanar da wani taron horo irin na Babban Kwas na Bude Karatu Ta Intanet (MOOC).Haka kuma, shirin zai shirya tarukan tattaunawa da musayar ra’ayi kan zaman lafiya a kowace karamar hukuma, tare da shiga cikin wata kungiyar masu aiwatar da ayyukan zaman lafiya domin gudanar da shirye-shiryen gina zaman lafiya a jihar.
Aikin ya ginu ne bisa kwarewar Engaging Borders SRD wajen gudanar da shirye-shiryen da suka mayar da hankali kan matasa a Nijar, Mali, Burkina Faso, Kenya da arewacin Nijeriya.Shirye-shiryen kungiyar sun fi mayar da hankali kan hanyoyin da ba su shafi amfani da qarfin soja ba wajen hana rikice-rikice da kuma samar da saqonnin da za su taimaka wajen yaki da ra’ayoyin da ke haddasa tashin hankali.
Babban Daraktan qungiyar, Richard Ali, ya ce an kirkiri shirin ne saboda bukatar ba da fifiko ga kwarewa da damar da matasa ke da su a Nijeriya, da kuma babbar rawar da za su iya takawa wajen tabbatar da zaman lafiya.Ya ce hakan na da muhimmanci musamman ganin yadda babban zaben 2027 ke kara kusantowa.
