Hukumar Kare Haƙƙin Masu Sayayya ta Jihar Kano (KCPC) ta kwace kwalaben lemun kwalba da suka kai 5,964 waɗanda wa’adin amfaninsu ya ƙare a Kasuwar Singer da ke jihar Kano. Hukumar ta ce ana zargin wani ɗan kasuwa ya tanadi kayayyakin ne domin sayar wa jama’a ba tare da sanin cewa sun ƙare ba.
Daraktan Ayyukan Bincike da Kwace Kayayyakin da Ba Su Inganta Ba na hukumar, Alhaji Auwalu A. Muhammad, ne ya bayyana hakan cikin wata sanarwa da Daraktan Wayar da Kan Jama’a, Jamilu Mustapha, ya fitar ranar Alhamis, 5 ga Nuwamba, 2026.
A cewarsa, hukumar ta samu ƙorafi kan wani ɗan kasuwa da ake zargin ya tanadi lemun kwalba masu yawa waɗanda wa’adin amfaninsu ya ƙare. Bayan samun bayanin, jami’an hukumar sun garzaya kasuwar domin gudanar da bincike da kwace kayayyakin kafin su shiga hannun masu sayayya.
Hukumar ta jaddada cewa za ta ci gaba da gudanar da bincike a kasuwanni, da shaguna da manyan kantuna domin gano wa tare da cire kayayyakin da wa’adinsa suka ƙare, ko suka lalace ko ba su cika ƙa’idojin inganci ba. Ta kuma gargaɗi ’yan kasuwa da kada su ɓoye kayayyakin da wa’adinsa suka ƙare ko su yi ƙoƙarin sauya bayanan wa’adin amfani da ke jikin marufinsu.
Babban Sakataren hukumar, Dr. Ibrahim Garba-Muhammad, ya yi kira ga ’yan kasuwa da su riƙa duba kayayyakinsu akai-akai tare da cire waɗanda suka ƙare daga shaguna. Ya kuma gargaɗi duk wanda zai yi ƙoƙarin tsoratar da jami’an hukumar, yana mai cewa suna gudanar da ayyukansu ne bisa doka domin kare lafiyar al’umma.
