Da daren jiya Asabar 13 ga watan nan ne, aka gudanar da shagalin bude bikin fina-finan kasa da kasa na Shanghai karo na 28, wanda hukumar kula da fina-finan kasar Sin ta jagoranta, kana babban rukunin gidajen rediyo da talabijin na kasar Sin wato CMG, gami da gwamnatin birnin Shanghai suka yi hadin gwiar shiryawa.
A jawabinsa yayin bikin, mataimakin shugaban CMG Yu Junsheng, cewa ya yi a ’yan shekarun nan, ana kara samun nagartattun fina-finan kasar Sin, yayin da CMG shi ma ke kara gabatar da shirye-shirye masu inganci, al’amarin da ya sa muka kara fahimtar cewa, wadatattun al’adu sun samo asali ne daga rayuwar dan Adam.
A matsayinsa na wanda ya gane wa idanu, kana yake ruwaito batutuwa, kuma bibiyar ci gaban fina-finan kasar Sin, CMG na fatan yin kokari tare da takwarorinsa a bangaren fina-finai, da shirye-shiryen TV na gida da waje, don gabatar da kayatattun shirye-shiryen zamanin da muke ciki, da rubuta makoma mai haske bisa hadin gwiwa.
Yayin bikin fina-finan kasa da kasa na Shanghai da zai gudana a tsawon kwanaki 10, za a gudanar da jerin harkoki da dama, ciki har da bikin bayar da lambobin yabo na “Golden Goblet Awards”, da dandalin tattaunawa na “Golden Goblet”, da bukukuwan gabatar da fina-finai, da bikin masu sha’awar kallon fina-finai da sauransu.
Gaba daya akwai fina-finai kusan 4,100 daga kasashe da yankuna 125, da suka yi rajistar halartar bikin na bana, adadin da ya kai matsayin koli a tarihi. (Murtala Zhang)
Discussion about this post