A Birnin ChongqingAn gudanar da taron kirkire-kirkire na duniya na kafafen yada labarai karo na biyar a yau Laraba 10 ga watan nan a birnin Chongqing. Wadanda suka halarci taron sun yi imanin cewa, taron ya tattaro hikimomi da karfin bangarori daban-daban, kuma ya zama muhimmin dandali ga kafafen yada labarai na kasashe daban-daban, don zurfafa musayar ra’ayi da koyi da juna.
Kazalika, shirin “AI+” da Sin ke aiwatarwa, ya samar da sabbin damammaki da kuma bude sabbin hanyoyi ga samun ci gaban Sin da duniya cikin hadin gwiwa. Wadanda suka halarci taron sun bayyana cewa, ya kamata a zurfafa aiwatar da shawarar wayewar kan duniya, da kuma gina dandamali na musayar wayewar kai ta yanar gizo, don inganta mu’ammalar jama’a.
Wannan taro, wanda babban rukunin gidan radiyo da talabijin na kasar Sin, wato CMG da gwamnatin birnin Chongqing suka shirya tare, an gudanar da shi ne karkashin taken “Nacewa Da Yin Kwaskwarima: Aikin Kafafen Yada Labarai A Zamanin Hikima”. Ban da wannan kuma, sashen CGTN na CMG ya gudanar da wani binicken jin ra’ayi tsakanin masu amfani da yanar gizo a duniya, wanda ya nuna amincewar masu bayyana ra’ayi da yadda fasahar AI ke taka muhimmiyar rawa wajen kawo sauyi a fannin samar da labarai.
A yayin binciken, kashi 78.2% na masu amsa tambayoyi sun yi imanin cewa, hanyoyin bayar da labarai ta kafafen yada labarai suna fuskantar sauyi mai zurfi a wannan zamani. Kaso 71.7% sun bayyana cewa, a zamanin basira, rawar da kafafen yada labarai za su taka wajen gadon al’adu, da yada su za ta kara bunkasa.
A lokaci guda, masu amsa tambayoyin sun nuna taka-tsantsan game da hadarin da fasahar AI za ta iya haifarwa ga kafafen yada labarai, inda kashi 91.1% suka yi kira da a yi amfani da dokoki, da ka’idoji don daidaita amfani da AI a kafafen yada labarai.
An buga wannan binciken a dandamalin harsunan Turanci, da Sifaniyanci, da Faransanci, da Larabci da Rashanci na kafar CGTN, kuma ya gudana cikin sa’o’i 24, inda masu amfani da yanar gizo 7,438 suka gabatar da ra’ayoyinsu. (Amina Xu)
