An sanya wuraren sana’ar kayan tangaran na hannu na Jingdezhen da ke kasar Sin, a cikin jerin wuraren tarihi na duniya na UNESCO yayin taro na 48 na kwamitin kula da wuraren tarihi na duniya na hukumar ta UNESCO, da aka gudanar a birnin Busan na kasar Koriya ta Kudu a yau Asabar.Wannan matakin ya sa jimillar wuraren da ke cikin jerin wuraren tarihi na duniya a kasar Sin ta kai 61.
Wuraren da ake sana’ar kera kayan tangaran na hannu da ke Jingdezhen, wani rukuni ne na wuraren tarihi da ke nuna tsarin wannan sana’a ta tangaran da ta bunkasa a Jingdezhen, birnin da ke lardin Jiangxi a gabashin kasar Sin, a tsakanin karni na 10 zuwa na 19.
A cewar kwamitin kula da wuraren tarihi na duniya, wannan wuri yana bayyana ci gaban kirkire-kirkire a fannin fasahar kasar Sin ta kera kayan tangaran da hannu, da fasahar tsara kayan tangaran, da kuma masana’antar samar da su.
Bugu da kari, yana nuna irin gagarumin tasirin da masana’antar kera kayan tangaran da hannu ta kasar Sin ta yi wajen bunkasar masana’antar kera kayan yumbu ko laka a duniya, da kuma bangaren cudanya da koyon juna tsakanin al’adu da wayewar kai mabambanta.
Kwamitin ya yaba da kokari da nasarorin da gwamnatin kasar Sin ta cimma wajen karewa tare da kula da wadannan wuraren tarihi. (Abdulrazaq Yahuza Jere)
