Majalisar Dokokin Jihar Kano ta yi kira da a sake duba dokar kula da haya ta jihar domin dakile ƙarin kuɗin hayar gidaje da shaguna ba bisa ƙa’ida ba, a daidai lokacin da hauhawar kuɗin haya ke ƙara jefa masu haya cikin matsin tattalin arziƙi.
Kakakin majalisar, Isma’il Falgore, ya bayyana hakan ne a zaman majalisar na ranar Litinin, bayan ɗan majalisar mai wakiltar Mazabar Takai, Musa Kachako, ya gabatar da ƙudiri kan hauhawar kuɗin hayar gidajen zama da wuraren kasuwanci. Kachako ya ce wasu masu gidaje na ƙara kuɗin haya ba tare da ba masu haya lokaci ba.
Ya bayar da misalin cewa kuɗin hayar wasu gidaje da a baya ake biya naira 100,000 a shekara ya tashi zuwa tsakanin naira 200,000 da naira 300,000. Haka kuma, kuɗin hayar wasu shaguna ya ƙaru daga naira miliyan ɗaya zuwa naira miliyan biyu cikin shekara guda.
Ɗan majalisar ya ce wannan yanayi ya fi shafar ƴan kasuwa, da manoma da masu ƙaramin ƙarfi waɗanda suka dogara da gidajen haya da shaguna wajen rayuwarsu. Duk da amincewarsa cewa masu gidaje na da ƴancin samun riba daga jarinsu, ya jaddada buƙatar samar da ƙa’idojin da za su tabbatar da cewa ƙarin kuɗin haya ya kasance cikin adalci, tare da kare haƙƙin ɓangarorin biyu.
Da yake goyon bayan ƙudirin, Mataimakin Kakakin Majalisar, Muhammad Butu-butu, ya buƙaci samar da ƙa’idoji bayyanannu kan ƙarin kuɗin haya da tantance masu neman haya, saboda tasirin da rashin isasshen bincike kan masu haya zai iya yi ga tsaro.
Ya kuma ce tsadar shaguna na iya tilasta wa wasu ƴan kasuwa ƙanana gudanar da sana’o’insu a kan tituna, lamarin da zai ƙara cunkoso. Sai dai ya amince cewa masu gidaje ma na fuskantar hauhawar kuɗin gini, da gyare-gyare da kula da muhimman abubuwan more rayuwa.
A martaninsa, Falgore ya ce dole ne a yi la’akari da muradun masu gidaje da masu haya yayin sake duba dokar. Ya buƙaci a yi shawarwari da kwamitin kula da haya na jihar da sauran masu ruwa da tsaki domin gano sassan dokar da ke buƙatar gyara. A cewarsa, tattaunawar za ta taimaka wajen samar da matakan da za su tabbatar da adalci tare da rage wa mazauna jihar nauyin kuɗin haya.
