Babban jirgin sama samfurin AG600 mai suna Kunlong da Sin ta kera a cikin gida, wanda ke iya tashi da sauka a kan doron kasa da cikin ruwa, ya kammala aikinsa na bana a Jiagedaqi da ke lardin Heilongjiang na arewa maso gabashin kasar Sin.  Kamfanin kera jiragen sama na kasar Sin wato AVIC ya bayyana a yau Litinin cewa, jirgin ya yi nasarar kammala ayyukan kai daukin gaggawa da na kare gobarar daji, na tsawon watanni 4 a sararin samaniya.  Kuma yayin aikin na watanni 4, ya yi tafiye-tafiye domin sintiri sau 35, inda ya kwashe tsawon sa’o’i 100 na tafiya lami lafiya, ya kuma zubo da ruwa kimanin ton 390.  Bisa la’akari da yadda yake iya shawagi a kusa da doron kasa kuma ba tare da gudu sosai ba, da karfinsa na daukar ruwa mai yawa da saukin sauya alkibla, jirgin ya nuna karfinsa na kai daukin gaggawa da kashe gobara a dazuka masu sarkakiya.  Kasar Sin ce ta kera jirgin na Kunlong da kanta, domin biyan bukatun kasar na kashe gobarar daji da ayyukan ceto a cikin ruwa. Kuma shi ne irinsa mafi girma a duniya da ba na aikin soja ba, idan aka kwatanta da nauyin da yake iya tashi da shi.  Nan gaba, jirgin zai shiga matakin aiki na yau da kullum, inda zai taimaka wa wani sabon samfuri mai karewa da kashe gobarar daji. (Fa’iza Mustapha) 

Shugaban kasar Mozambique, Daniel Francisco Chapo, ya ce aikin gona yana da matukar muhimmanci ga Mozambique, don haka yana fatan...

A yau Lahadi aka kammala gasar wasanni ta nahiyar Asiya ta Aichi-Nagoya, bayan shafe makonni 2 ana fafatawa, inda Sin ta kankane teburin lambar yabo ta zinare, karo na 12 a jere.   Kasar Sin ta kammala da lambobin zinare 169 da na azurfa 89 sai tagulla 83, karo na farko da ta nuna irin wannan bajinta a gasar ta nahiyar Asiya da aka yi a ketare.  Kasar Japan ce ta zo a matsayi na 2 da zinare 83 da azurfa 95 sai tagulla 91, sai Koriya ta Kudu da ta rufa mata baya da zinare 39 da azurfa 43 da tagulla 68.  ‘Yan wasa da jami’ai sama da 17,000 daga kasashe da yankuna 45 ne suka shiga gasar yayin da aka karya matsayin bajinta na duniya fiye da 50.  Dan wasan tsere na kasar Thailand Puripol Boonson da ‘yar wasan ninkaya ta Sin Yu Zidi ne suka samu karramawar ‘yan wasa mafi daraja a gasar, a ajin maza da na mata.  An mika tutar gasar daga hannun Aichi-Nagoya zuwa birnin Doha, da zai karbi bakuncin gasar wasannin ta nahiyar Asiya karo na 21.(Fa’iza Mustapha) 

Asibitin tafi da gidanka na jirgin sojin ruwan Sin na Auspicious Ark, ya isa Conakry, babban birnin kasar Guinea jiya Asabar, domin fara ziyarar sada zumunta na kwanaki 7 da bayar da hidimomin kiwon lafiya. Wannan shi ne karo na farko da asibitin jirgin ruwan ya je kasar Guinea.  Jirgin, wanda ke gudanar da shirin kiwon lafiya mai taken Mission Harmony-2026, ya isa tashar ruwa ta Conakry da misalin karfe 10 na safe agogon kasar.  Jami’an gwamnati da na rundunar sojin Guinea da jakadan Sin a kasar da babban jami’in soji na ofishin jakadancin Sin da sauran ma’aikatan ofishin da mazauna birnin da wakilan Sinawa mazauna ketare da na kamfanonin Sin, sun taru a tashar domin tarbar jirgin.  Yayin ziyarar shugaban shirin na Mission Harmony-2026, zai tattauna da shugabannin rundunonin sojin kasar Guinea. (Fa’iza Mustapha)  )

Wakiliyar dindindin ta kungiyoyin agaji na Red Cross da Red Crescent na kasa da kasa (IFRC) a kungiyar Tarayyar Afrika da hukumomin kasa da kasa Asha Mohammed, ta ce suna daukar ayyukan hadin gwiwa da kasar Sin a matsayin mai matukar ma’ana kuma suna sa ran kara karfafawa da fadada hadin gwiwa da kasar a karin bangarori.  Asha Mohammed wadda kuma ke jagorantar tawagogin IFRC na kasashen Habasha da Djibouti, ta bayyana haka ne yayin hirar da ta yi da kamfanin dillancin labarai na Xinhua, a gefen taron kara wa juna sani kan karfafa juriyar al’umma ga kungiyoyin agaji na Red Cross da Red Crescent, karkashin tsarin hadin gwiwar Sin da Afrika da ya gudana a Beijing.  Cibiyar horo ta kungiyar Red Cross ta Sin ce ta karbi bakuncin taron na makonni 2 a watan Satumba, wanda kuma ya samu goyon bayan kungiyar IFRC  Wakilai 26 daga kungiyoyin Red Cross da Red Crescent na kasashen Afrika 19, tare da wakilan IFRC, sun halarci lakcoci tare da yin ziyarce-ziyarce da tattaunawa yayin taron, inda suka yi musayar dabaru da daukar darusa daga dabarun Sin wajen rage barazanar annoba da kara juriyar al’ummomi da samar da ci gaba mai dorewa.  A cewar Asha Mohammed, kasar Sin tana shiga ayyukan karfafa kwarewa a matakin Kungiyar Tarayyar Afrika, ciki har da wadanda ke mayar da hankali kan wadatar abinci da tsare-tsaren kiwon lafiyar al’umma, kuma tana gabatar da dabarunta masu daraja. (Fa’iza Mustapha) 

Kasar Sin ta kammala aikin samar da babban bangaren tashar tura iskar carbon dioxide cikin kasa, da ke cikin teku, yayin da sabon dandalin rijiyar hakar iskar gas ta Dongfang1-1 ta shiga matakin kaddamarwa a yau Lahadi.    Wannan aiki na gwaji, an tsara ta yadda zai rika tura iskar carbon dioxide da aka tara zuwa karkashin kasa domin bunkasa samar da iskar gas. Da zarar tashar ta fara aiki, za ta ba da damar adana ton sama da miliyan 1 na carbon dioxide a kowacce shekara, lamarin da zai rage fitar da hayaki mai guba a babban mataki, a masana’antar makamashi ta Sin ta cikin teku.  Dandalin zai tara tare da tace carbon dioxide da aka samar tare da iskar gas, sannan ya matse, ya mayar da shi karkashin kasa. Wannan aiki zai inganta hakar iskar gas da kuma adana iskar carbon dioxide har abada.  Rijiyar hakar iskar gas ta Dongfang 1-1, ita ce irinta ta farko da Sin ta samar da kanta, wadda ke cikin teku, kuma babbar rijiyar hakar gas mafi yawan iskar Carbon dioxide. Tun bayan fara aiki a 2003, ta samar da iskar gas cubic mita sama da biliyan 50. (Fa’iza Mustapha) 

Tun daga yau Lahadi 4 ga watan nan ne, za a fara gabatar da sabon shirin TV na al’adun kasar Sin mai suna Kasar Sin a Tsoffin Littattafan Gargajiya a babban rukunin gidajen rediyo da talabijin na kasar Sin wato CMG.  Shirin zai taimaka wa masu kallo kara fahimtar wasu shahararrun littattafan gargajiyar kasar Sin guda 11, a wani mataki mai kama da “sanya rai” cikin rubuce-rubucen littattafan gargajiyar kasar Sin. (Murtala Zhang) 

Ma’aikatar kula da cinikayya ta kasar Sin ta bayyana a yau Lahadi cewa, kasar ta taka muhimmiyar rawa a taron...

Tawagar kasar Sin ta kammala gasar wasanni ta nahiyar Asiya da jimilar lambobin yabo 341 da suka hada da zinare...

An kira taron ministocin kasuwanci na kungiyar G20 a birnin Milwaukee na kasar Amurka, daga ranar 30 ga watan Satumba zuwa ranar 1 ga watan Oktoba, inda ministocin kasuwanci ko wakilansu na kasashe membobin kungiyar gami da kasar Poland suka halarci taron. Wakilin kasar Sin a bangaren shawarwarin kasuwanci da kasashen duniya, wanda har ila yau shi ne mataimakin ministan kasuwanci na kasar, Li Chenggang ya halarci taron, tare kuma da gabatar da jawabi.  Li ya bayyana cewa, sakamakon kalubalen ra’ayin nuna bangaranci, kasar Sin tana kira ga kasashe membobin G20 da su aiwatar da ra’ayin kara mu’amalar mabambantan sassa, da goyon-bayan tsarin kasuwanci mai kunshe da bangarori daban-daban karkashin jigon kungiyar WTO, da kiyayewa, gami da inganta ka’idar bai wa kasashe fifiko a matsayin tushe, da tabbatar da zaman karko da kyakkyawan fata ga kasuwancin duniya.  Har wa yau, Li ya ce, samar da isasshen abinci na da alaka sosai da rayuwar dan Adam da zaman lafiya a kowace kasa, kuma kasar Sin ta bayar da gudummawa ga kokarin samar da wadataccen abinci ga duk duniya. Ya kara da cewa, ya dace kasashe membobin G20 su yi kokarin rage shingen cinikayya, da ba da tabbacin samar da isasshen abinci ba tare da wata matsala ba. Game da batun da ya shafi karfin samar da kayayyaki, ya ce ya kamata a yi nazari daga dukkan fannoni na duniya, da inganta shawarwari da hadin gwiwa maimakon yin fito-na-fito. Bugu da kari, ya ce kasar Sin tana adawa da daukar matakai na kashin kai da bin ra’ayin ba da kariya ga kasuwanci, bisa hujjojin da suka shafi tinkarar batun samar da kayayyaki fiye da kima, ko kawar da batun yin aiki ala-tilas. (Murtala Zhang)