A yau Laraba da safe, an kaddamar da bikin aza kwandunan furanni na karrama ’yan mazan jiya albarkacin ranar jaruman kasa a filin Tian’anmen dake birnin Beijing, inda manyan shugabannin Jam’iyyar Kwaminis ta kasar Sin da na kasa, da suka hada da Xi Jinping da sauransu, da kuma wakilai daga bangarori daban daban, suka halarci bikin.  Da karfe 10 na safiyar yau, aka fara bikin a hukumance. Shugaba Xi Jinping da manyan jami’an JKS da na kasa, sun hau kan dandamalin wurin tunawa da jaruman kasa, sa’an nan, suka tsaya a gaban kwandunan furannin. Daga bisani, Xi Jinping ya matsa gaba don gyara ribon din dake kan kwandunan furanni. Bayan haka, Xi Jinping da sauran shugabannin JKS da na kasa sun yi tafiya a hankali suna zagaya wurin tunawa da jaruman na kasa domin nuna girmamawa.  Bana, shekara ce ta cika shekaru 105 da kafuwar Jam’iyyar Kwaminis ta kasar Sin, kana shekara ce ta cika shekaru 90 da cimma nasarar Doguwar Tafiya ta jar rundunar sojojin kasar Sin. Bisa jagorancin kwamitin tsakiyar JKS dake karkashin jagorancin shugaba Xi Jinping, dukkanin ’yan jam’iyyar da sojoji da kuma al’ummomin kabilu daban daban a kasar Sin, suna bin ruhin kafuwar JKS, da ruhin Doguwar Tafiya mai girma, inda suka nuna kwarin gwiwa da yin hadin gwiwa, domin gina kasa mai karfi da neman farfadowar kasa a dukkanin fannoni ta hanyar zamanantarwa. (Mai Fassara: Maryam Yang) 

A yau Laraba ne jiragen fasa dusar kankara na kasar Sin wato Xuelong da Xuelong 2, ko kuma Snow Dragon da Snow Dragon 2 suka komo birnin Shanghai da ke gabashin kasar Sin, bayan shafe kusan watanni uku a balaguron binciken yanayi karo na 16 a yankin tekun Arctic.   Jiragen sun yi nasarar kammala muhimman ayyuka, wadanda suka hada da cikakken bincike da sanya idanu, hadin gwiwa tsakanin kasa da kasa, da kuma karfafa binciken kimiyya, inda tawagar masu binciken ta shaida cewa an samu nasara sosai a duka binciken da aka gadunar.  An cimma gagarumar nasara yayin balaguran, musamman ta fuskar gano sabbin abubuwa na kimiyya, da gagarumin ci gaba a fahimtar ka’idojin nazarin kimiyya, da gwaje-gwajen fasaha da amfani da kayan aikin bincike wadanda za su taimaka wajen fahimta da kuma magance kalubalan sauyin yanayi da kuma samar da ci gaba mai dorewa a yankin Actic.(Mai fassara: Suleiman Suleiman) 

Kwanan nan, an kammala gasar nuna kwarewar sana’o’i ta duniya karo na 48 cikin nasara a birnin Shanghai dake gabashin kasar Sin. A fagen gasar, tawagar Sin ta shiga sahun gaba a duniya a fannoni da dama, tun daga injin da na'ura mai kwakwalwa ke sarrafawa zuwa mutum-mutumin inji na masana’antu, da fasahar walda, gami da aikin gini bisa fasahar zamani. Amma abin da ya fi jawo hankula shi ne, tsarin da Sin take da shi waje raya wadannan fasahohi, da rawar da wannan tsarin ke takawa ga hadin gwiwar kasashe masu tasowa, matakin da zai canza makomar matasan Afirka.  Kwarewar da Sin ta nuna a gasar ta dogara ce kan cikakken tsarin horar da kwararrun fasaha. Ya zuwa yanzu, makarantun sana’o’i na Sin sun wuce 10,000, kana daliban da ke karatu a cikinsu yawansu ya wuce miliyan 33, ban da haka, jimillar kwararrun fasaha a duk kasar ta haura miliyan 200. Daga cikinsu kwararrun fasaha mafi hazaka sun wuce miliyan 72. Ruhin wannan tsari shi ne, kwarewar fasaha ba tana ginuwa a kan “hanyar da za a bi idan babu sauran mafita” ba ce, sai dai a kan turbar samun “mafita mafi kyau”. A Sin, adadin samun aikin yi na daliban da suka kammala makarantun fasahar ya dade yana zarce sama da kashi 95% a ko wace shekara. Sin ta tabbatar da cewa, matukar ana mallakar fasaha, to za a rika samun mafita.  Matasan Afirka ma sun hau wannan hanya.   A wannan gasar, Afirka ta Kudu ta tura masu fafata gasar su 29 don shiga rukunan fasaha 27 na gasar. Kasar Namibia ta tura matasa 17 don fafatawa a ayyuka 16. Kana Uganda ma ta tura masu fafatawa 3 a fagen jinya da walda da dafa abinci. Duk da cewa yawan masu shiga gasar ba shi da yawa, amma kasashen Afirka sun fara bayyana karfinsu a wannan bangare. Sin na son raba damammaki da more fasahohinta da kasashe masu tasowa, musamman kasashen Afirka, don tabbatar da huldar hadin gwiwa mai amfani ga kowa. Hadin gwiwar fasaha na zama sabuwar hanyar hadin gwiwar Sin da Afirka.  Afirka na da dimbin matasa. A cewar Majalisar Dinkin Duniya, sama da kashi 60% na al’ummar yankin kudu da hamadar Sahara na Afirka suna kasa da shekaru 25 da haihuwa ne. Zuwa shekarar 2030, rabin yawan karin ’yan kwadago na duniya da za a samu zai fito ne daga wannan yankin. Amma, kashi 98% na ’yan Afirka da ba su kai shekaru 18 ba, ba su mallaki fasahar STEM, wato kimiyya da fasaha da injiniyanci da lissafi bayan kammala karatunsu ba. Abin da Afirka ke matukar bukata shi ne kwarewar “Fasahohin sana’o’i”. Hakan ya sa hadin gwiwar Sin da Afirka samun wata sabuwar hanya mafi dacewa.  Cibiyar Luban wani mataki ne dake karkashin wannan tsari na hadin gwiwa. Tun daga shekarar 2016, Sin ta kafa cibiyoyin Luban a kasashe da dama a Afirka, inda kasar ta ba da horon sana’o’i kamar kera kayayyaki ta amfani da injin da na'ura mai kwakwalwa ke sarrafawa da aikin lantarki da na walda da sarrafa mutum-mutumin inji da sauransu. A Djibouti, cibiyar Luban ta bude sashen kula da harkokin jirgin kasa, don horar da kwararrun fasaha na cikin kasar domin layin jirgin kasa mai hada Addis Ababa da Djibouti. A Masar, cibiyar Luban ta bude kwasa-kwasan sarrafa inji mai kwakwalwa da mutum-mutumin inji na masana’antu. A Kenya kuwa, cibiyar Luban tana ba da horo a kan fasahohin zamani ta yadda matasan za su zama masu fasaha bayan kammala samun horo.  ’Yan kasar Sin da suka fafata gasar, wadanda suka tsaya kan dandalin lambar yabo a wannan gasa, da kuma matasan Afirka da suke samun horo a cibiyar Luban, dukkansu sun ci gajiyar tsarin horar da kwararrun fasahohin sana’o’i da Sin ta aiwatar. Sin ta dauki shekaru da dama wajen tabbatar da bai wa matasa makoma mai kyau bisa wannan mataki, kuma a yanzu tana raba dabarunta ga kasashen Afirka ta hanyar hadin gwiwar kasashe masu tasowa. Samun lambobin zinari a gasar ya sheda nasarar wannan tsari, amma ma’ana mafi zurfi ita ce a ba mutane da yawa damar mallakar fasahohin.  Fasaha ba ta da iyaka, kuma ba za a bar kowa a baya ba a wannan bangare. Lokacin da masu sana’a na Sin ke samun lambobin a dandalin duniya, matasan Afirka ma za su iya koyon sana’a iri daya, ta hakan za su sami mafitarsu.(Marubuciya: MINA) 

A yau ne ake bikin ciki shekaru 54 da fitar da sanarwar hadin gwiwa ta Sin da Japan. Albarkacin ranar, mai magana da yawun ma’aikatar harkokin wajen kasar Sin Guo Jiakun, ya ce kundayen siyasa hudu wadanda Sin da Japan suka amincewa, ciki har da sanarwar hadin gwiwa, sun kafa wani tushen siyasa, da shari’a a alakar Sin da Japan, sun kuma kafa dokokin inganta matakan warware manyan batutuwa dake jan hankulansu, ciki har da tarihi da batun yankin Taiwan.   Guo ya ce bai kamata a jirkita tarihi, ko a mayar da hannun agogo baya ba, kana bai dace a illata wadannan ka’idoji ba. Ya kara da cewa tarihi ya sha nanata cewa, ta hanyar amincewa da ruhin kundayen siyasa hudu ne kadai Sin da Japan, za su iya wanzar da kawance bisa turba ta gari.   Jami’in ya ce, “A wannan rana mai tarihin musamman, muna sake kira ga masu jagorantar gwamnatin Japan, da su yi waiwaye matuka kan tarihi, su gyara kurakuransu, kana su aiwatar da matakai na hakika don komawa dalilai, da kudurin kundayen siyasan nan guda hudu.  (Saminu Alhassan) 

Wani rahoto da aka fitar a Talatar nan, ya nuna cewa ya zuwa karshen watan Yunin bana, adadin masu amfani...

Wasu rahotanni na cewa a ranar Juma’a 25 ga watan nan, hukumar lura da harkokin teku ta Philippines, ta fitar...

An gudanar da taron musamman game da batun yin kwaskwarima kan hanyoyin samun ci gaba na kungiyar cinikayya ta duniya wato WTO, a jiya Litinin 28 ga wannan wata, inda zaunanniyar wakiliyar Sin dake kungiyar WTO Li Yongjie ta yi nuni da cewa, a cikin shekaru fiye da 30 da aka kafa kungiyar WTO, yawan kasashe da yankuna na tattalin arziki masu tasowa da suka taka rawa a yayin bunkasa tattalin arziki da cinikayya na duniya ya karu, amma kasashe da yankuna masu tasowa sun fuskanci matsalolin kayyade fitar da kayayyaki iri-iri, da kuma raya karfin samar da kayayyaki da sauransu. Kasar Sin ta tsaya tsayin daka kan maida fannin samun ci gaba a muhimmin matsayi, a yayin  kwaskwarima ga kungiyar WTO, da kuma sa kaimi ga yin tattaunawa kan batun ta hanyar tambaya da bayar da amsa. Ya kamata daftarin da Sin ta gabatar a gun taron, ya taka muhimmiyar rawa wajen daidaita matsalolin da kungiyar ke fuskanta, amma ba tare da yin la’akari da kwamitoci da yarjejeniyoyi daban daban ba.  Mahalartar taron sun nuna amincewa ga daftarin kasar Sin, kuma kasar Brazil, da kungiyar tarayyar Afirka, da kasashen Pakistan, da Indiya, da Indonesia da sauransu, sun nuna goyon baya ga mayar da samun ci gaba a matsayin tushen yin kwaskwarima, sun ce bai kamata a yi amfani da ma’auni guda wajen daidaita bukatun ci gaba daban daban ba.(Zainab Zhang) 

Kasar Sin ta fitar da wani shiri na bunkasa masana’antar kera sabon samfurin batir a yayin gudanar da shirin bunkasa ci gaban kasa da zamantakewar al’umma na shekaru biyar-biyar karo na 15 (2026-2030), inda ta kuduri aniyar cimma nasarar habaka masana’antar, da sabbin kirkire-kirkiren fasaha, da kuma ingancin kayayyaki.  Shirin, wanda sassan gwamnati da dama suka fitar bisa hadin gwiwa ciki har da ma’aikatar masana’antu da fasahar sadarwa, na da nufin tabbatar da ci gaban masana’antar mai dorewa da kuma kakkarfan kwazo wajen iya kirkire-kirkire a dukkan sassan tsarin masana’antar, nan da shekarar 2030.  Kazalika, kasar Sin na da burin samun gagarumin ci gaba a fannin tsare-tsaren kera sabon batirin nan da shekarar 2030.  Shirin ya yi tanadin fara yawaita amfani da dukkan baturan da aka kera a ma’auni mai girma, tare da tabbatar da cewa tsawon wa’adin aikin baturan lithium zai iya kunsar zagayen caji da amfani da su sau 15,000, nan da shekarar 2030.  A cewar shirin dai, ana sa ran yawan baragurbin da ake samu a kayayyakin manyan kamfanoni zai ragu har ya kai matakin da ake auna shi da “kananan adadi cikin biliyan”, nan da shekarar 2030. (Abdulrazaq Yahuza Jere) 

Fu Cong, zaunannen wakilin Sin dake MDD, ya fitar da jawabi a gun taron MDD da aka gudanar domin tunawa...

Ministan harkokin wajen kasar Sin, Wang Yi, ya bayyana cewa, babban aikin da ya rataya a wuyan Japan shi ne gyara katobara da kura-kuran shugabanninta kan batun Taiwan cikin gaggawa.  Wang, wanda har ila yau shi ne darektan ofishin hukumar kula da harkokin waje na kwamitin tsakiya na Jam’iyyar Kwaminis ta Sin (JKS) kuma mamba a ofishin siyasa na kwamitin tsakiya na jam’iyyar, ya bayyana hakan ne yayin ganawa da Takeshi Iwaya, shugaban kungiyar karfafa cinikayyar kasa da kasa ta Japan (JAPIT), a birnin Beijing.  Wang ya bayyana cewa, babban abin da ke da muhimmanci shi ne rungumar nuna hali nagari dangane da batutuwan tarihi. Ya kara da cewa, ya kamata Japan ta samar da kyakkyawar fahimta da tunani mai kyau game da kasar Sin a matsayin ginshiki.  Kazalika, Wang ya kuma ce ana fatan kungiyar JAPIT da dukkan mutane masu hangen nesa za su ci gaba da raya al’adar abota, da karfafa gwiwar Japan wajen daukar matakin da ya dace tare da bayar da amsa mai gamsarwa.  A nasa bangare, Iwaya ya bayyana cewa, yanayin da dangantakar Japan da Sin ke ciki a yanzu abin damuwa ne. Inda ya ce bai kamata Japan ta manta da darussan da ta koya a baya ba, kuma ya zama wajibi ga ’yan siyasar Japan su jagoranci kasar a kan turbar da ta dace, tare da ci gaba da tsayawa tsayin daka kan tafarkin samun ci gaba cikin lumana. (Abdulrazaq Yahuza Jere)