Da safiyar yau Asabar, firaministan kasar Sin Li Qiang, ya halarta tare da gabatar da jawabi a bikin bude taron kasa da kasa na 2026 kan likitancin gargajiya a birnin Beijing.  Li Qiang ya ce likitancin gargajiya na zaman wani karfi na musammam da ke kare lafiyar dan adam da bunkasa nasarar wayewar kai. Ya ce la’akari da shafe lokaci mai tsawo ana amfani da shi, likitancin gargajiya na Sin ya samar da wata hanya ta musammam ta samun ci gaba.  Ya ce ya kamata kasashen duniya su karfafa hadin gwiwa da kuma amfani da albarkatun likatancin gargajiya na duniya da hada shi cikin tsarin kiwon lafiya, da aiki tare domin shawo kan kalubalen lafiya da dan adam ke fuskanta.  A cewar firaministan, kasar Sin za ta sauke nauyin da ya rataya a wuyanta iya karfinta da bayar da gudunmuwa wajen cike gibin kiwon lafiya da ake da shi a duniya. (Mai fassara: Fa’iza Mustapha) 

Fu Cong, zaunannen wakilin Sin da ke MDD, ya jaddada bukatar bin tsarin da kasashen Afirka ke jagoranta domin cimma mafita ta siyasa ga rikicin kasar Sudan.   Fu Cong ya bayyana hakan ne jiya Jumma’a, yayin wani taron Kwamitin Sulhu na MDD kan nazarin halin da Sudan ke ciki.  Fu ya ce, kasar Sin ta dade da rike matsayi mai adalci game da batun Sudan, kuma ta yi kira da a kawo karshen rikicin da wuri. Ya ce tun bayan barkewar rikicin, kasar Sin ta samar da tallafin kayayyaki iri-iri ga Sudan, wadanda suka hada da abinci, kayayayyakin likitanci, da kayayyakin ceton jama’a da sauransu. Kuma za ta ci gaba da bayar da taimako gwargwadon karfinta, tare da taka rawar gani wajen dawo da zaman lafiya da kwanciyar hankali a Sudan.  A wannan rana kuma, a gun wani taro mai taken “Duniya a nan gaba: Sake gina aminci ta hanyar daukar matakai kan sauyin yanayi”, wanda shugaban babban taron MDD ya shirya, Fu Cong ya yi kira da a karfafa tsarin shugabancin yanayin duniya, tare da hanzarta aiwatar da sauyi zuwa tsarin muhalli mai tsafta. Ya bayyana cewa, kasar Sin tana taka rawar gani wajen ingantawa da bayar da gudummawa ga ayyukan kula da yanayin duniya, inda ta shiga hadin gwiwa kan ayyukan kiyaye muhalli tare da kasashe da yankuna sama da 100, wanda hakan ya ba da muhimmiyar gudummawa wajen tunkarar kalubalen sauyin yanayi. (Safiyah Ma) 

Wata takardar bayani da kasar Sin ta fitar yau Asabar, ta ce a shekarun baya-bayan nan, tsarin ilimin sana’o’i na...

Shugaban kasar Botswana Duma Gideon Boko, ya ce akwai dimbin fasahohi masu kyau a fannin raya kasa da kasar Sin ta samu, wadanda suka cancanci kasar Botswana ta koya.  Shugaba Boko ya bayyana haka ne a lokacin da ya yi hira da wakilin kafar CGTN ta kasar Sin, yayin ziyarar da ya yi a kasar a baya-bayan nan.  Ya kara da cewa, daga cikin fasahohin akwai kokarin raya bangaren masana'antu, don ganin kasa ta samu cikakkiyar kwarewar kirkira da samar da kayayyaki, ta yadda al'umma za su samu kwarin gwiwa kan makomar kasarsu.  Ban da haka, a cewar shugaba Boko, asalin imanin Sinawa kan kasarsu shi ne dogon tarihi da dimbin al'adu masu ma'ana na kasar. Kuma sakamakon wadannan abubuwa masu daraja, kasar Sin ta fi dogaro da karfinta da hadin kan al'ummarta wajen daidaita matsalolin da take fuskanta, maimakon neman taimako daga sauran kasashe. Ya ce kasar Botswana ta yarda da ruhin Sinawa na hadin kai da jajircewa, kuma tana son koyon dabarar kasar Sin ta raya kasa.  Sa'an nan, Duma Gideon Boko, ya tabo maganar huldar dake tsakanin kasarsa da kasar Sin, inda ya ce, kasar Sin ta kan nuna cikakken sahihanci, da kokarin tabbatar da girmama juna, yayin da take hulda da sauran kasashe. Kuma ba ta taba neman samun moriya ta wata hanya maras dacewa ba. A sabili da nagartacciyar halayyar da kasar Sin take da ita ne, ta gabatar da manufar yafe wa kasashen Afirka da suke da huldar diflomasiyya da ita harajin fito, wadda ta zama dama mai kyau ga kasashen Afirka, don su habaka bangaren ciniki, da kokarin magance radadin tasirin da yanayin rashin tabbas na kasuwannin duniya ke haifar musu, da karfafa imani a tsakanin bangarorin Afirka da Sin, da hadin gwiwar da ake yi tsakanin kasashe masu tasowa. (Bello Wang) 

Ministan harkokin wajen Sin Wang Yi, ya gana a Alhamis da shugaban Isra’ila Isaac Herzog bisa bukatar hakan da Herzog...

Ministan harkokin wajen kasar Sin Wang Yi, wanda ya kasance wakilin musamman na shugaban kasar Sin Xi Jinping, a taron karawa juna sani karo na bakwai, dangane da zakulo dabarun gina cudanya da kwarin gwiwa a shiyyar Asiya ko CICA a takaice, ya gabatar da jawabi a taron na jiya Alhamis, inda ya ce, kasashen Asiya ne suka kafa dandalin CICA, da nufin gudanar da shawarwari da hadin gwiwa.  Kuma tun kafuwarsa, CICA ya taka rawar gani wajen samar da nasarar muhimman kudurinsa biyar, wato wanzar da zaman lafiya tare, da bunkasa hadin gwiwa mai cikakken tsari bisa matakan gina kwarin gwiwa, da nacewa manufar cudanyar mabambantan sassa, da aiki tukuru wajen karfafa tushen gaskiya don cimma zaman lafiya da tsaro a Asiya.  Ya ce, kasar Sin na matukar jinjinawa kwazon kasar Azerbaijan, dangane da bunkasa hadin gwiwar dandalin yayin kasar ke jagorancinsa, kuma Sin a shirye take ta ci gaba da nuna matukar goyon baya da shiga a dama da ita a ayyukan dandalin. Wang ya kara da cewa, a gabar da ake ta fuskantar sauye-sauye cikin sauri irin wadanda ba a ga irinsu ba a cikin wani karni, ta hanyar hade kan al’ummu wuri guda bisa makomar bai daya, da kasancewa a bangaren gaskiya a tarihi, da rungumar goyon bayan juna, da hadin gwiwa ne kadai kasashen Asiya za su wuce gaba a lokuta daban daban, kana za su iya sauya kalubale zuwa damarmaki da hada hannu wajen samar da makoma mai nagarta. (Saminu Alhassan) 

Hukumar kididdiga ta kasar Sin ta ce abun da kasar ke kashewa a bangaren bincike da kirkire-kirkire (R&D), ya karu...

Cibiyar lura da harkokin waje ta alummar kasar Sin ta ce za a gudanar da dandalin tattaunawa, game da batun...

Yau Juma’a aka bude taron kasa da kasa na 2026 kan raya ilimin fasahohi da sana’o’in hannu a birnin Tianjin...

Yau Juma’a 16 ga watan Oktoba ita ce ranar abinci ta duniya, kuma taken ranar shi ne “Kirkira a yanzu, don tabbatar da samun isasshen abinci a gobe”.   Taken ranar ya nuna burin da aka sanya, wato tabbatar da samun isasshen abinci. Rahoton da hukumar abinci da noma ta Majalisar Dinkin Duniya FAO ta fitar kan kamfar abinci na duniya ya nuna cewa, har yanzu akwai mutane sama da miliyan 280 a duniya da ke fuskantar matsanancin karancin abinci. Yankin kahon Afirka, da yankin Sahel, da kudancin Afirka su ne yankunan da suka fi jin radadin matsalar.  A nata bangare, nasarorin da Sin ta samu a fannin tabbatar da samar da isasshen abinci sun jawo hankulan mutanen duniya. Alkaluma na nuna cewa, a shekarar 2025, yawan amfanin gona da aka girbe a kasar ta Sin ya kai matsayin sama da kilo biliyan 700 a ko wace shekara, kuma adadin abinci ga kowane mutum ya wuce kilogiram 480, wanda ya zarta layin tabbatar da samun isasshen abinci wato kilogiram 400 da duniya ta amince da shi.   Sin ba ta tsaya kan nasarorin da ta samu ba, ta san cewa tabbatar da samun isasshen abinci ba aikin kasa daya ba ne, nauyi ne dake wuyan al’ummar duniya baki daya.  A Madagascar, shinkafar da aka tagwaita irinta da ake kiranta da “Tsarabe”, wato “abu mafi kyau”, an buga hotonta a kan takardar kudi mafi daraja ta kasar. Ta wannan hanya Madagascar tana nuna girmamawa ga wani masanin ilimin aikin gona na kasar Sin, wato Yuan Longping. Madagascar ta sauya daga kasa mai shigar da abinci zuwa wata muhimmiyar kasar noman shinkafa a Afirka, bisa fasahar Yuan Longping ta samar da sabon iri ta hanyar tagwaita irin shinkafa.  Ban da wannan kuma, a kauyen Midekin na Chadi, gonakin gwaji da tawagar kwararrun aikin gona ta Sin suka kafa a wurin, suna iya samar da shinkafa sama da tan 10.03 a kan filin gona na kadada 1, adadin da ya kusan ninka matsakaicin yawan shinkafar da a kan samu a wurin har sau 3. Tawagar kuma ta gina karamar masana’antar sarrafa shinkafa, inda ta hakan ake iya “girbe shinkafa da safe, tare da sarrafa ta da tsakar rana kuma a sayar da ita da yamma”.  A Tanzania kuma, kwararrun Sin sun ingiza aikin hadin gwiwar noma mai taken “Karamin wake mai gina jiki”, wanda ya taimaka wajen kara yawan amfanin gona kamar masara da wake a yankin. Kauyukan misali 4 da kwararrun suka samar musu da taimako, sun shigar da kusan dubun mutane na yankin da kewaye cikin aikin gona, inda yabanyar wake da gonar misali ta samar ya haura kilo 400 bisa gonar eka 1, wanda ya karu fiye da ninki biyu idan an kwatanta da tsarin noma na gargajiya a wurin.  Dakin gwaje-gwajen hadin gwiwa na fasahar noman zamani tsakanin Sin da Kango Brazzaville, na “ziri daya da hanya daya” ya riga ya shigo da nau’ikan amfanin gona 59 na Sin domin yin gwaji a wurin, inda aka zabi nau’ikan masara 11, da nau’ikan wake 7 wadanda suka dace da yanayin wurin. Daga cikinsu, nau’in wake na Sin mai suna “Guixiadou 105”, ya samar da wake ton 4.2 a kowace kadada yayin aikin gwaji. Dakin gwaje-gwajen ya kuma horar da kwararrun fasahar noma na wurin har su 236.  Matakan da Sin ke dauka na hadin gwiwarta da kasashen Afirka ba kawai bayar da kudi da kaya ba ne, har ma yana gabatar da fasahohin noma, da dabarunsa, da tsarin harkokin masana’antu zuwa Afirka, domin taimaka wa manoman Afirka su dogara da karfin kansu.  Ranar 1 ga watan Mayun bana, Sin ta fara aiwatar da manufar cire haraji gaba daya kan hajojin kasashen Afirka 53 da ke da huldar diflomasiyya da ita, wanda hakan ya sa albarkatun noma masu inganci da yawa na Afirka, suke iya shiga kasuwar Sin kai tsaye ba tare da bukatar biyan haraji ba. Albarkatun noma na musamman na Afirka kamar su ridi, da kofi, da avocado da dangin gyada na kyashu duk suna shiga kasuwannin Sin, wato dai taimakon da Sin take bayarwa, ba wai kawai na “Samun karin amfanin gona”ba, har ma da “Sayar da su yadda ya kamata”.  Tabbatar da samar da isasshen abinci ba aiki ne na wata kasa guda ba ne, aikin hadin gwiwa ne na kasashen duniya baki daya, musamman ma kasashe masu tasowa. Sin a matsayin babbar kasa mai sauke nauyi, ta samarwa Afirka wata dabarar da ake iya koya, da yadawa don tabbatar da samar da isasshen abinci a duk nahiyar Afirka, ta dogaro da hanyar raba fasaha, da bude kofa, da hadin gwiwar tsarin samar da kayayyaki.  Ma’anar ranar abinci ta duniya ba wai kawai tana tunatar da mu cewa “Har yanzu akwai masu fama da yunwa” ba ne, a hannu guda tana amsa tambayar “yaya za a kawar da yunwa”. Sin ta dauki shekaru da dama wajen amsa wannan tambaya, kuma a yanzu tana taimakawa Afirka wajen amsa wannan tambaya. Hoton shinkafar da aka tagwaita irinta a kan takardar kudi ta Madagascar, da gonakin shinkafa na Chadi, da wake na Tanzania, da dakin gwaje-gwajen fasahar noma na hadin gwiwa na Kango Brazzaville, wadannan ba “ayyukan taimako” ba ne, “matakai ne na samar da kwarewar aiki”. Lokacin da manoman Afirka suke samar da isasshen abinci da hannuwansu, tabbatar da samar da isasshen abinci a duk duniya zai samu tushe na hakika. (Marubuciya: MINA)