Hukumar Kiyaye Haɗura ta Ƙasa ta yaba wa sashen sufuri na Dangote Cement bisa gagarumin ci gaba da sauye-sauye masu anfani da ya samu wajen inganta tsaron hanya, tana mai cewa an samu raguwar haɗurran manyan motocin dakon kaya a faɗin Nijeriya bayan ƙaddamar da sabbin manufofin tsaron sufuri da gyare-gyaren gudanarwa.
Hukumar ta bayyana Dangote Cement a matsayin abin koyi wajen kula da harkokin sufuri da bin ƙa’idojin tsaron hanya, ba kawai a Nijeriya ba har ma a faɗin nahiyar Afirka.
Da yake jawabi yayin wata ziyarar da Dangote Cement ya kai hedikwatar Hukumar Kiyaye Haɗura ta Ƙasa ranar Talata, shugaban hukumar, Shehu Mohammed, ya yaba wa kamfanin bisa kafa sabbin ma’auni wajen kula da tsaron hanya, tare da ƙarfafa su don su ci gaba da aiwatar da tsare-tsaren da ke sauya fasalin harkokin sufuri a Nijeriya.
Bayanan kwatancen shekarun 2025 da 2026 sun nuna cewa an samu raguwar kashi 56 cikin 100 na haɗurran da suka shafi manyan motocin Dangote Cement, tare da raguwar mace-mace da kashi 36 cikin 100 da kuma raguwar raunuka da kashi 52 cikin 100.
A cewar shugaban hukumar, waɗannan nasarori sun nuna yadda kamfanin ya yi nasarar aiwatar da tsarin nazarin giɓin tsaro da kuma ƙa’idojin cikin gida na kula da tsaron sufuri, waɗanda ya ce sun cancanci sauran masu harkokin sufuri da jigilar kaya a faɗin Afirka su yi koyi da su.
Ya ƙara da cewa nasarar Dangote Cement ta ƙara tabbatar da cewa idan manyan kamfanoni suka ba da muhimmanci ga tsaro, alfanun hakan zai amfani ƙasa baki ɗaya da ma nahiyar Afirka.
Tun da farko, shugaban sashen sufuri na Dangote Cement, Murilo Silɓa, ya bayyana irin ci gaba da zuba jari da kamfanin ke yi a sabbin tsarin kula da harkokin sufuri, ciki har da fasahohin bincike ta atomatik da hanyoyin amfani da basirar na’ura mai ƙwaƙwalwa (AI) domin ƙara inganta aiki da tsaron hanya.
Murilo Silɓa ya ce daɗaɗɗen haɗin gwiwar da kamfanin ke yi da Hukumar Kiyaye Haɗura ta Ƙasa wajen tsarawa da aiwatar da manufofin sufuri yanzu na fara haifar da sakamako mai kyau.
Ya ƙara da cewa baya ga manufofin tsaron sufuri na musamman da kamfanin ke da su, har yanzu suna bai wa sake tantance direbobi da ci gaba da horas da su muhimmanci sosai.
Shi ma Babban Jami’in Lafiya, Tsaro, Muhalli da Ɗorewar Cigaba (HSSE) na Masa’antun, Dr. James Adenuga, ya bayyana cewa waɗannan nasarori sun samo asali ne daga jajircewar shugabanci da cikakken goyon bayan manyan jami’an gudanarwa wajen rungumar sabbin dabaru.
Dr. Adenuga ya jaddada cewa Dangote Cement na ci gaba da mai da hankali wajen inganta ayyukanta ta hanyar gyare-gyare masu ɗorewa, ƙarfafa matakan tsaro da kuma amfani da sabbin fasahohi domin ƙara inganci, bin ƙa’idojin duniya da samar da amfani mai ɗorewa ga masu ruwa da tsaki da al’ummomin da kamfanin ke aiki a cikinsu.
Haka kuma, jami’in kula da tsaron manyan motocin kamfanin a Nijeriya, Ozoɓehe Abraham, ya bayyana cewa kamfanin ya ƙaddamar da sabbin fasahohi domin sanya ido kan yadda direbobi ke tafiya a ainihin lokaci.
Ya ce waɗannan tsarin suna taimakawa wajen tabbatar da bin ƙa’idojin tsaro, gano direbobin da ke yin haɗari da wuri, da kuma ci gaba da inganta ƙwarewar direbobi.
Ozoɓehe Abraham ya ƙara da cewa a halin yanzu kamfanin na sake tsara da ƙarfafa dokar iyaka gudu a matsayin wani ɓangare na matakan tsaron aiki domin ƙara rage haɗurran hanya da tabbatar da bin doka da aminci wajen jigilar kaya.
Tawagar Dangote Cement da ta kai ziyara hedikwatar Hukumar Kiyaye Haɗura ta Ƙasa sun haɗa da Daraktan Sashen Sufuri, Obajana Hemant Rana (Col. mai ritaya); shugaban binciken ababen hawa kafin tafiya, Charles Theophilus; da Dr. Jibrin Abubakar daga sashen hulɗa da jama’a da yaɗa labarai na kamfanin.
