A cikin tattalin arzikin duniya na yau, samun saukin gudanar da harkokin kudi ya zama muhimmin ginshiki wajen bunkasa kasuwanci tsakanin kasashe. Ba wai yawan kayayyakin da kasashe ke sayarwa da siya kawai ke kayyade karfin alakar tattalin arziki ba, tsarin biyan kudi, farashin hada-hadar kasuwanci, da saukin samun canjin kudi suna taka muhimmiyar rawa.
A wannan mahangar ce ake kallon amincewar da Babban Bankin Jama’ar Sin ya yi kwanan nan ga Bankin Standard na Afirka ta Kudu da kuma Bankin ICBC na kasar Sin, su gudanar da aiki cikin hadin gwiwa a matsayin bankin saukaka samun kudin RMB, ya zama wani muhimmin mataki da zai zurfafa hadin gwiwar tattalin arzikin Sin da Afirka.Tsarin zai ba kamfanoni da cibiyoyin kudi daga kasashen Afirka 19 damar gudanar da hada-hadar kudin yuan (RMB) kai-tsaye a bisa tsarin kudin cikin gida na Sin, abin da zai iya rage wasu matsalolin da ke tattare da biyan kudin ciniki da zuba jari ta amfani da dalar Amurka. Wannan shi ne karo na farko da aka bai wa wata cibiyar kudi a Afirka irin wannan cikakkiyar dama ta saukaka samun kudin RMB a nahiyar.
Tsawon shekaru dai, dalar Amurka ta kasance babbar hanyar gudanar da cinikayyar duniya, amma ga kasashe masu tasowa kamar na Afirka, dogaro da dala ya kara jefa su tsaka-mai-wuya saboda yanayin tattalin arzikinsu na shigo da kayayyaki. Don haka, a kasuwancin Sin da Afirka, amfani da dala ya kara tsawaita tsarin hada-hadar kudi. Mai sayarwa a Afirka da mai saye a Sin na iya fuskantar bukatar canza kudi daga wani nau’in kudi zuwa wani kafin a kammala ciniki, inda hakan yake haifar da jinkirin kammala biyan kudi da kuma fargabar hawa da saukar dalar.
Wasu rahotannin nazarin kasuwanci, sun nuna cewa amfani da RMB kai-tsaye zai iya taimakawa wajen kauce wa wasu daga cikin wadannan karin matakai, domin kamfanonin Afirka za su iya biyan kudin kayayyaki daga Sin da yuan kai-tsaye maimakon dogaro da tsarin dala. Wannan mataki dai ya zo ne a lokacin da dangantakar tattalin arzikin Sin da Afirka ke kara karfi musamman ma bayan shirin soke biyan harajin kwastam na kasar Sin ga kayayyakin kasashen Afirka 53 masu alakar diflomasiyya da ita, da ake shigarwa kasuwanninta. Hade tsarin saukaka kasuwanci da na biyan kudi na iya samar da wani sabon yanayi da zai taimaka wajen fadada ciniki tsakanin bangarorin biyu.
Masu fitar da kayayyaki daga Afirka, musamman a fannoni kamar noma, ma’adanai, da kayayyakin masana’antu, na iya amfana daga wannan tsarin da zai rage matsalolin kudi da kuma fita daga kangin dala, saboda samun karin zabi na biyan kudin hada-hada zai kara masu saukin gudanar da kasuwanci har ma da taimaka wa gwamnatocinsu wajen tsara manufofin kasuwancinsu.
Nasarar wannan shiri dai ba za ta tsaya ga saukaka biyan kudi ba, har ma da taimaka wa Afirka bunkasa masana’antu, da fitar da kayayyakin da aka sarrafa, da inganta gina kasuwanci mai daidaito wadanda suka samu tazgaro saboda kangin dala da tsarin kasuwancin duniya mai siffar kashin Dankali. (Abdulrazaq Yahuza Jere)
