Labarin da hadaddiyar kungiyar masu kananan sana’o’i ta kasar Sin ta gabatar a jiya Talata 3 ga wannan wata ya bayyana cewa, a shekarar 2025 da ta wuce, tattalin arzikin bangaren kananan sana’o’i na kasar ya gudana yadda ya kamata. Inda darajar kayayyakin da manyan kamfanonin kananan sana’o’in kasar suka samar ta karu da kaso 5.3 cikin dari idan aka kwatanta da na makamancin lokaci na shekarar 2024, kuma ta kai kaso 13 cikin dari na masana’antun fadin kasar. Haka kuma kimar darajar kananan sana’o’in ta kai kaso 16.5 cikin dari na kudin shigar masana’antun kasar, da kuma kaso 18.8 cikin dari na ribar da aka samu a bangaren.
Alkaluman da aka fitar sun nuna cewa, saurin karuwar darajar masana’antun kera kekuna dake aiki da wutar lantarki, da batura, da kayayyakin roba da ake amfani da su a gida ya zarta kaso 20 cikin dari, kana darajar sana’ar gyara amfanin gona da abinci ta karu da kaso 5.6, darajar sana’ar samar da abinci ta karu da kaso 5.3 a mizanin shekara- shekara.
Haka zalika, a cikin muhimman kayayyakin kananan sana’o’i 90 da hukumar kididdigar kasar Sin ta fitar, adadin kayayyakin nau’ika 35 da aka kera ya karu, alal misali, adadin kekuna dake aiki da wutar lantarki ya karu da kaso 21.6 cikin dari a kan na shekarar 2024, kuma adadin baturan makamashin hasken rana ya karu da kaso 7.6 cikin dari. (Mai fassara: Jamila)
