Tsohon Sanata mai wakiltar Kaduna Ta Tsakiya, Shehu Sani, ya bayyana cewa tsare tsohon Gwamnan Jihar Kaduna, Nasir El-Rufai, sakamakon irin mummunan salon shugabancinsa da kuma rashin mutunta doka a lokacin da yake kan karagar mulki.
Sani ya bayyana cewa abin da tsohon gwamnan ke fuskanta a yanzu ya dace da abubuwan da ya aikata a baya, yana mai cewa El-Rufai ya kwashe shekaru takwas yana mulki cikin nuna isa, da ƙin bin umarnin kotu, da kuma ƙuntata wa abokan hamayya. Ya ce: “Duk abin da mutum ya shuka a lokacin da yake riƙe da madafun iko, shi zai girba idan ya sauka.”
Da yake tsokaci kan lamarin a wata hira da aka yi da shi a gidan talabijin na Channels TV, tsohon ɗan majalisar ya bayyana yadda tsohon gwamnan ya riƙa rusa gidajen ƴan adawa tare da gallaza wa masu sukar gwamnatinsa a Kaduna, yana mai jaddada cewa mulki ba ya dawwama ga kowa.
A cewarsa, halin da El-Rufai ya tsinci kansa a ciki ya zama babban darasi ga dukkan masu riƙe da madafun iko a halin yanzu, domin su sani cewa shugabanci amana ce kuma dole ne su guji nuna fin-ƙarfi ga al’umma.
Tsohon sanatan ya jaddada cewa tsarin dimokiraɗiyya a Nijeriya na buƙatar adalci da mutunta ƴancin ɗan’adam, yana mai cewa babu wani mutum da ya fi ƙarfin doka komai girman muƙaminsa ko tasirinsa a siyasa.
