Shugaban Ghana John Dramani Mahama, ya ƙaddamar da sashen tace ɗanyen mai da aka gyara a matatar mai ta Tema, matakin da ya kawo ƙarshen tsaikon aiki da matatar ta fuskanta na tsawon lokaci saboda matsalolin kuɗi da na kayayyakin aiki.
A karon farko, matatar ta samu nasarar karɓa da kuma sarrafa gangar mai miliyan ɗaya da aka haƙo daga filin mai na Jubilee na ƙasar Ghana.
Shugaba Mahama ya jaddada cewa wannan babban ci gaba ne da ke nuna cewa Ghana za ta iya tace nata man ba tare da dogaro da matatun ƙasashen waje ba.
Baya ga sashin CDU da aka buɗe, an kuma kammala gyaran sashin RFCC wanda ke tace ragowar mai mai kauri.
Wannan gagarumin aiki zai taimaka wajen rage yawan kuɗaɗen ƙasashen waje da Ghana ke kashewa wajen shigo da taceccen mai.
Hakan zai rage matsin lamba akan kuɗin ƙasar Cedi, ta yadda zai daidaita farashin man fetur a kasuwa, sannan zai samar da guraben ayyukan yi da dama ga matasa.
Shugaba Mahama ya bayyana cewa burin gwamnatinsa shi ne ta faɗaɗa ƙarfin matatar ta Tema don ta riƙa tace gangar mai 100,000 a kowace rana.
Shugaban ya kuma bayyana cewa, gwamnati na shirin sauya fasalin matatar baki ɗaya domin ta zama babbar cibiyar tace mai da za ta riƙa wadatar da yankin Afirka ta Yamma.
