Gidauniyar ‘Foundation for Digital Justice and Sustainable Development’ ta shigar da kara a Babbar Kotun Tarayya da ke Abuja kan zargin cewa kamfanin TikTok ya daƙile wa wasu masu amfani da manhajar damar shiga shafinsa a wasu jihohin Arewacin Nijeriya.
A cikin karar da jaridar Daily Trust ta gani, kungiyar ta zargi TikTok da toshe masu amfani da manhajar a jihohin Kaduna, Kebbi, Kano da Sakkwato.
Kungiyar, ta hannun lauyanta Festus Ogun, ta bukaci kotun ta tantance ko matakin da ake zargin TikTok ya dauka ya saba wa ‘yancin fadin albarkacin baki da kundin tsarin mulkin Nijeriya ya bai wa ‘yan kasa, tare da tantance ko hakan ya zama nuna wariya ga masu amfani da manhajar a jihohin da abin ya shafa.
An shigar da karar mai kwanan wata 5 ga Oktoba, 2026, bisa tanade-tanaden Sashe na 39, 42, 45 da 46 na Kundin Tsarin Mulkin Nijeriya na 1999, da kuma Fundamental Rights Enforcement Procedure Rules 2009, tare da wasu tanade-tanaden Yarjejeniyar Afirka kan ’Yancin Dan’Adam.
Mai shigar da karar ya ce TikTok ba shi da hurumin doka na takaita masu amfani da manhajar a jihohin Arewa da abin ya shafa, yayin da yake barin masu amfani da manhajar a sauran sassan kasar su ci gaba da amfani da ita ba tare da takura ba.
Gidauniyar ta bukaci kotun ta ayyana matakin da ake zargin TikTok ya dauka a matsayin “ba daidai ba, wanda ya saba wa kundin tsarin mulki kuma ba shi da ingantaccen dalili”, tana mai cewa hakan ya keta hakkokin ’yan kasa na fadin albarkacin baki da kuma samun kariya daga wariya.
Har ila yau, Gidauniyar na neman kotun ta bayar da umarnin cewa TikTok ya gaggauta cire takunkumin da ake zargin ya sanya, tare da hana kamfanin sake takaita masu amfani da manhajar a Arewacin Nijeriya ko wani ɓangare na kasar ba tare da ingantaccen dalili na doka ba.
