Gwamnatin Tarayya ta umarci jami’o’i da sauran manyan makarantu a faɗin ƙasar nan da su riƙa dakatar da ɗaliban da ake samu da amfani da miyagun ƙwayoyi akai-akai, a matsayin wani sabon mataki na yaƙi da shaye-shaye a makarantu.
Umarnin na ƙunshe ne cikin ƙa’idar aiwatar da manufofin yaƙi da miyagun ƙwayoyi da amfani da su a manyan makarantu a Nijeriya, wadda ta tanadi hanyoyin gwajin ƙwayoyi na dole, ba da shawara, da gyaran hali ga ɗalibai.
Bisa ga ƙa’idar, ɗaliban da aka samu da laifin amfani da miyagun ƙwayoyi bayan sun wuce matakai uku na gwaji bayan sun samu kulawar gyara hali, za a iya cire su daga muhallin makaranta na wani lokaci domin su samu kulawa da gyaran hali.
“Ɗaliban da aka samu da laifi a gwaji na biyu za a sake musu gwaji karo na uku, kuma idan aka sake samun suna amfani da miyagun ƙwayoyi, za a dakatar da su na wani lokaci daga makaranta domin su samu kulawar ƙwararru da kuma gyaran hali,” in ji ƙa’idar.
