Kamar dai yadda Ɗan’adam ke kamuwa da wasu cututtuka a lokacin damina, su ma dabbobi kan iya kamuwa da wasu ire-iren cututtuka daban-daban a lokacin damina.
Wasu daga cikin cututtukan da ke harbin dabbobin a lokacin damina sun haɗa da kamar irin su; waɗanda ke haifar musu da rama, ciwon baki da na ƙafa, inda cutar dabbobin da suka kamu, za su iya yaɗa wa sauran dabbobi.
Matuƙar ba a ɗauki matakan gaggawa kan cututtukan ba, hakan zai iya jawo wa masu kiwon tabka asara.
Yana da matuƙar kyau, masu kiwon su riƙa kiyayewa da alamomin cututtukan, musamman domin a ɗauki matakan gaggawa a lokacin na damina.
Kazalika, cutar na kuma harfin ƴan maraƙai da kuma manyansu, kamar irin su sanyi da sauyin yanayi.
Akwai kuma cutar da ake kira da BƘ, da ƙwayar cutar da ake kira a turance ‘Clostridium’ da ke harbin dabbobin, wanda za ta iya sanyawa dabbobi daga kashi 80 zuwa 100.
Ta fi harbin dabbobi, masu watanni daga tsakanin shida zuwa shekaru biyu.
Alamominta: Sun haɗa da zazzaɓi mai zafi, rikiɗewar Idanunsu zuwa ja, rage cin abinci da kuma yin tuƙar Ciyawa.
Kazalika, akwai cutar ƙafa da baki, wato a turance ‘Foot and Mouth’, inda ƙwayar cutar da ake kira a turance ta ‘Aphthoɓirus genus’ ke haddasa ta, wacce mafi akasari ta fi harbin shanu.
Alamominta: Sun haɗa da zazzaɓi mai zafi, ramar ƙafa da yawan zubar da miyau, inda daga baya, sai ƙuraje su fito a kan harshensu, kuma ta sanya musu yin ɓarin ciki.
Bugu da ƙari, akwai cutar da ake kira da BRD, wacce ta fi harbin ƙanannan dabbobi, ciki har da ƴan maraƙai.
Akasari, tana afkuwa ne, saboda ƙwayoyin cuta da kuma masu saurin yaɗuwa, inda hakan jawo harbin sauran dabbobi.
Alamominta: Dabbobin da suka kamu da cutar, za su riƙa yawan yin tari, zazzaɓi da kuma yin numfashi da ƙyar.
Alamomin Tsutsar Da Ke Kama Su: Akwai kuma alamomin tsutsa da ke kama su, da suka haɗa da kamar; Kaska da sauransu, inda hakan ke shafar lafiyarsu.
Matakan Kare Su Daga Kamuwa Da Cututtukan:
A cewar wasu likitocin dabbobi, yi wa dabbobin allurar rigafi, a kan lokaci, zai kare su daga kamuwa da irin waɗannan cututtukan.
Misali, dangane da cutar da ke kama baki da ƙafafuwa, musamman shanu, ana buƙatar masu kiwon su riƙa yi musu allurar rigakafi duk bayan wata shida ko kuma sau biyu a shekara.
Ana kuma buƙatar masu kiwon, su tabbatar da sun ɗauki matakan kare yaɗuwar cututtukan daga jikin dabbobin da suka kamu, inda ake so a riƙa wanke ƙafafuwan dabbobin da suka kamu da cutar da ke kama su, a baki da wani sinadarin da ake kira a turance ‘copper sulfate’ da sauransu.
Ana kuma so, dabbobin da kamar kwarkwata ko kaska ta kama, a riƙa shafa musu sinadarin iodine a jikinsu, aƙalla har sau bakwai ko kuma a riƙa shafa musu garin tafarnuwa.
Har ila yau, a riƙa kuma kare dabbobin daga shiga cikin taɓo, a lokacin na damina tare da kuma tabbatar da ana tsaftace wajen kwanansu ta hanyar barin sa a bushe.
Idan har an ankare da duk wata irin alama ta waɗannan ƙwayoyin cututtukan, ana buƙatar masu kiwon su yi gaggawar tuntuɓar likitocin dabbobi.
Waɗanne Matakai Ake Bi Domin Kare Dabbobin Daga Kamuwa Da Cututtuka A Lokacin Na Damnina?
Ana buƙatar masu kiwon su tabbatar da tsaftar dabbobin da ciyar da su abinci mai gina jiki, tabbatar da ana yi musu allurar rigafi, a-kai-a-kai da kuma yi musu wanka da magungunan da ke kashe tsutsar da ke hawa jikinsu.
Kazalika, yana da kyau masu kiwonsu, su riƙa yawan kai su wurin likitocin dabbobi, domin su riƙa duba lafiyarsu, sannan ana kuma so a riƙa ajiye su a wuri mai tsafta.
Bai kuma dace a riƙa ciyar da su da abincin da ya ruɓe ba, ko kuma ruwan shan da ba shi da tsafta.
Ta Yaya Su Kansu Dabbobin Za Su Iya Kare Kansu Daga Cututtuka A Lokacin Damina?
Wasu daga cikin dabbobi da kuma tsintsaye, suna da nasu dabarun da suke kare kansu daga kamuwa da cututtuka a lokacin damina. Misali, wasu na yin amfani da gashin jikinsu, wajen karkaɗe ruwan sama da ya sauka a jikinsu, wanda hakan ke ba su damar busar da jikinsu a kan lokaci.
Wasu kuma, kamar irin su saniya da kuma bujimai, ƙirazansu na da ƙarfi kuma gashinsu na da kauri, inda suke samun shigar iska, ko da kuwa sun jiƙe tare da kuma taimaka musu wajen samun jin ɗumi a jikinsu, inda wasu sauran ƙananan dabbobii a lokacin da ake yin ruwan sama, suke ɓoyewa a ƙarƙashin bishiya, domin samun kariya.
