Gwamnatin Tarayya ta fara shirye-shiryen samar da sabon tsarin doka da ƙa’idoji domin inganta harkar gine-gine a Nijeriya, da nufin kawo ƙarshen yawaitar rugujewar gine-gine, da daƙile ayyukan maginan bogi da kuma tabbatar da bin ƙa’idojin gine-gine a faɗin ƙasar. Ministan Gidaje da Raya Birane, Injiniya Muttaqha Rabe Darma, ya ce sabon tsarin zai samar da ingantaccen tsarin sa ido kan harkar gine-gine tare da ƙara kare rayuka da bunƙasa tattalin arzikin ƙasa.
Ministan ya bayyana hakan ne ranar Litinin a Abuja yayin da ya karɓi shugabannin Majalisar Kula da Aikin Injiniya ta Nijeriya (COREN) ƙarƙashin jagorancin shugabanta, Farfesa Sadiq Zubair Abubakar. Ya ce ma’aikatar za ta gabatar da daftarin tsarin ga masu ruwa da tsaki kafin ƙarshen watan Yuli domin tattaunawa, kafin daga bisani a miƙa shi ga Majalisar Zartarwa ta Tarayya (FEC) domin amincewa.
A cewar Darma, sabon tsarin zai daidaita ayyuka da nauyin ƙungiyoyin ƙwararru a fannin gine-gine tare da tabbatar da cikakken bin ƙa’idojin gine-gine da ƙa’idodin aikin ƙwararru. Ya nuna damuwa cewa raunin tsarin sa ido ya bai wa mutanen da ba su cancanta ba damar gudanar da ayyukan gine-gine, lamarin da ya haddasa gine-gine marasa inganci da yawaitar rugujewarsu a sassan ƙasar. Ya jaddada cewa gwamnati ta kuduri aniyar tsaftace fannin da dawo da ƙwarewa da bin ƙa’ida.
A nasa jawabin, Shugaban COREN, Farfesa Sadiq Zubair Abubakar, ya taya ministan murnar naɗin da aka yi masa, yana mai bayyana ƙwarin gwiwa cewa zai inganta harkar gidaje da gine-gine ta hanyar ƙarfafa tsarin sa ido da bin doka. Ya kuma gayyace shi zuwa Taron Injiniyoyi karo na 34, wanda ake sa ran zai haɗa ƙwararrun injiniyoyi da masu fasaha tsakanin 8,000 zuwa 9,000 daga Nijeriya da ƙasashen waje, inda za a tattauna batutuwan tsaron jama’a, bin ƙa’idoji da kuma sabbin hanyoyin hukunta masu karya dokokin gine-gine.
