Kungiyar Gwamnonin Arewa Maso Gabas (NEGF) ta yi kira ga Gwamnatin Tarayya da ta farfado da ayyukan binciken man fetur da suka tsaya a Jihar Borno, tare da yabawa Shugaba Bola Ahmed Tinubu kan matakan da ake dauka na farfado da aikin hako man fetur na Kolmani a Jihar Gombe.
Kiran na daga cikin abubuwan da aka bayyana a wata sanarwa da kungiyar ta fitar bayan kammala taronta karo na 13, wanda aka gudanar a Gidan Gwamnatin Borno da ke Maiduguri a ranar Asabar.
Taron na kwanaki biyu, wanda aka gudanar daga 2 zuwa 3 ga Oktoba, 2026, ya hada gwamnonin jihohin Arewa Maso Gabas shida da suka hada da Adamawa, Bauchi, Borno, Gombe, Taraba da Yobe, domin tattauna batutuwan tsaro, hadewar tattalin arzikin yankin da ayyukan more rayuwa.
Yayin karanta sanarwar kungiyar, mataimakin shugaban NEGF kuma Gwamnan Jihar Adamawa, Rt. Hon. Umaru Fintiri, ya bukaci Gwamnatin Tarayya da ta sake duba ayyukan binciken man fetur da aka fara a baya amma daga bisani suka tsaya a kananan hukumomin Magumeri da Gubio na Jihar Borno.
Gwamnonin sun kuma nuna matukar godiya ga Shugaba Tinubu kan sabunta kulawar Gwamnatin Tarayya ga wasu muhimman ayyukan more rayuwa a yankin.
Daga cikin ayyukan da aka ambata akwai layin dogo na Fatakwal–Jos–Bauchi–Gombe–Maiduguri, binciken man fetur a Kolmani, da kuma aikin hanyar Akwanga–Jos–Bauchi–Gombe–Biu–Maiduguri.
