Shugaba Bola Tinubu ya bayar da umarnin a kama Prince George Buchi Nwabueze bayan gano wata hukumar gwamnati da ake zargin ta bogi ce da ke a cikin Ofishin Sakataren Gwamnatin Tarayya (SGF).
Hukumar da ake kira National Brands Development and Made in Nigeria Special Project Office, hukumar yaƙi da cin hanci da rashawa (ICPC) ce, ta gano ta.
Shugaban ICPC, Dakta Musa Adamu Aliyu, ya bayyana hakan ne yayin da yake ganawa da manema labarai na Fadar Shugaban Ƙasa bayan wata ganawa da Shugaba Tinubu a ranar Juma’a.
Aliyu ya ce an gano hukumar ne a yayin wani bincike da ake gudanarwa kan wata hukumar bogi mai suna Presidential Foreign Intervention Promotion Council, wadda hukumomi suka ce Adeyemi Matthew ne ke jagoranta.
A cewarsa, an ware wa sabuwar hukumar ofishin aiki a cikin harabar Ofishin Sakataren Gwamnatin Tarayya ba tare da samun izini ba.
Shugaba Tinubu ya kuma bayar da umarnin dakatar da Sakatarori uku daga aiki saboda zargin su da hannu a lamarin.
Waɗanda aka dakatar su ne M.S. Danjuma, Injiniya Nadungu Gagare da Richard P. Pheelangwah.
Ana sa ran hukumomi za su yi ƙarin bayani yayin da ake ci gaba da bincike.
