Jami’an tsaro sun ceto wata mata mai juna biyu da wasu mutane bakwai da ’yan bindiga suka yi garkuwa da su a Jihar Kaduna.
An ceto mutanen ne tsakanin 31 ga watan Oktoba zuwa 2 ga watan Nuwamba, a wani samamen haɗin gwiwa da DSS, ’yansanda, sojoji da Ofishin Mai Bai wa Shugaban Kasa Shawara Kan Harkokin Tsaro suka gudanar.
Matar mai juna biyu, Jamila Muhammad, mai shekaru 27, an yi garkuwa da ita ne a ranar 6 ga watan Oktoba lokacin da ’yan bindiga suka kai hari yankin Alrahus Estate da ke Millennium City, ƙaramar hukumar Chikun.
Rahotanni sun ce cikin Jamila ya ɓare a lokacin da take hannun waɗanda suka sace ta.
Sauran mutanen da aka ceto sun haɗa da Talatu Yakubu, mai shekaru 40; Yunana Bawa, mai shekaru 30; Calista Bishop, mai shekaru 27; Chidinma Onuwere, mai shekaru 36; Eucharia Obi, mai shekaru 41; Godiya Victor, mai shekaru 50; da wata yarinya mai shekaru takwas, Miracle Alex.
Kwamishinan ’Yansandan Jihar Kaduna, Muhammad Rabiu ne, ya sanar da ceto mutanen a ranar Talata, inda ya ce jami’an tsaro na ci gaba da ƙoƙarin wargaza ƙungiyoyin masu garkuwa da mutane a jihar.
Ya ƙara da cewa za a tura motocin sintiri 30 da motocin yaƙi masu sulke guda takwas domin ƙarfafa tsaro.
Rabiu ya buƙaci al’umma su riƙa bai wa jami’an tsaro sahihan bayanai domin taimakawa wajen yaƙi da garkuwa da mutane da ayyukan ’yan bindiga.
