Kamfanin Man Fetur na Ƙasa (NNPCL) ya tura jimillar Naira tiriliyan 11.14 zuwa Asusun Tarayya a matsayin kuɗaɗen da doka ta tanada tsakanin watan Janairu da Satumba na shekarar 2026.
Sai dai kamfanin ya samu raguwar kuɗaɗen shiga da kashi 28.3 cikin 100, inda ya samu Naira tiriliyan 33.15 a cikin watanni tara, idan aka kwatanta da Naira tiriliyan 46.26 da ya samu a daidai wannan lokaci na shekarar 2025.
Rahoton kuɗaɗen kamfanin na watan Satumba na 2026 ya nuna cewa kuɗaɗen shigarsa sun ƙaru zuwa Naira tiriliyan 4.608 a watan, daga Naira tiriliyan 3.737 da ya samu a watan Agusta.
Haka kuma, ribar kamfanin bayan cire haraji ta ƙaru zuwa Naira biliyan 509 a watan Satumba, daga Naira biliyan 431 da ya samu a watan Agusta.
Duk da wannan ƙarin, kuɗaɗen shigar kamfanin na watanni tara sun yi ƙasa da na shekarar da ta gabata da kusan Naira tiriliyan 13.11.
A ɓangaren kuɗaɗen da ya tura Asusun Tarayya, NNPC ya biya Naira tiriliyan 11.14 cikin watanni tara na 2026, idan aka kwatanta da Naira tiriliyan 11.56 da ya tura a daidai wannan lokacin na shekarar 2025.
A fannin ayyukan samar da makamashi kuwa, kamfanin ya ce yawan man fetur da iskar gas da ya samar ya kai ganga miliyan 3.04 a kowace rana a watan Satumba, idan aka kwatanta da ganga miliyan 3.01 a watan Agusta.
Yawan ɗanyen mai da sauran makamantansa ya kai ganga miliyan 1.70 a kowace rana, yayin da samar da iskar gas ya ƙaru zuwa ƙafa miliyan 7,789 a kowace rana.
