Hukumar lura da sufurin jiragen kasa ta kasar Sin, ta fitar da wasu alkaluma dake nuna bunkasar hada-hadar jigilar hajoji ta layukan dogo na kasar, cikin watanni biyar na farkon shekarar nan ta 2026.
Alkaluman da hukumar ta fitar a Lahadin nan, sun nuna yadda aka yi jigilar hajojin da suka kai jimillar tan biliyan 1.67, ta layukan dogo tsakanin watan Janairu zuwa Mayun bana, wanda hakan ya shaida karuwar kaso 1.8 bisa dari kan mizanin shekara-shekara.
Kazalika, kiyasin adadin taragun jiragen kasa dake dakon hajoji a kullum, cikin watannin biyar ya kai 186,300, karuwar da ta kai ta kaso 2.8 bisa dari idan an kwatanta da na adadin makamancin lokacin na shekarar da ta gabata.
Har ila yau, alkaluman sun nuna yadda adadin jigilar hajojin zuwa sassan kasa da kasa ke gudana bisa daidaito. Yayin da adadin hidimomin dakon kayayyaki ta jiragen kasa tsakanin Sin da Turai, da tsakanin Sin da sauran kasashen Asiya, ya kai sau 15,506 cikin watannin biyar, wanda shi ma ya karu da kaso 12.6 bisa dari a mizanin shekara-shekara. (Saminu Alhassan)
Discussion about this post