A yanzu haka yanayin duniya ya shiga wani lokaci na babban sauyi irin wanda ba a taba gani ba tun bayan yakin duniya na biyu, kuma masu fashin baki na kara mayar da hankali kan muhimman tambayoyi biyu; wato batun abun da ke wakana a duniya, da ko me kasar Sin ke yi kan hakan.
A matsayin wata muhimmiyar taga da duniya ke iya leka mahangar kasar Sin da ma kara fahimtar kasar, manyan taruka biyu na kasar Sin na bana suna kara janyo hankulan al’ummun duniya. A jajiberin bude tarukan biyu, kafar CGTN, da hadin gwiwar da cibiyar tuntuba kan harkokin kasa da kasa ta jami’ar Tsinghua, sun fitar da rahoton hasashen muhimman batutuwa na shekarar nan ta 2026.
Rahoton ya nuna cewa, a shekarar nan ta 2026, an fara aiwatar da shirin raya tattalin arziki da zamantakewar al’ummar Sin na shakaru biyar-biyar karo na 15, da cika shekaru 105 da kafuwar JKS. Ginshikai da nasarorin da Sin ta cimma bisa zamanantar da kanta, ana fatan su zamo alkiblar sassan kasa da kasa. A daya hannun kuma, tsarin aiwatar da cikakken shirin samar da ci gaba bisa kirkire-kirkire, da himmatuwa wajen aiwatar da manufofi da ka iya ingiza samar da hajoji masu inganci, zai shigar da sabon kuzari na dorewar ci gaban tattalin arzikin kasar na dogon lokaci. Bugu da kari, zurfafa sauye-sauye da bude kofa, tare da ingiza saurin samar da dunkulalliyar kasuwar kasa mai inganci, da cikakken tsari, da adalci, kuma budaddiya ga kowa, zai karfafa ginshikan cikin gida na raya tattalin arziki, da juriyarsa ga matsaloli daga waje. Har iya yau, rahoton ya nuna cewa, batutuwa masu nasaba da “juriyar tattalin arziki, da tsarin bunkasa fifikon kasuwar gida, da cin gajiya daga damammakin kasuwannin waje, za su ci gaba da kasancewa muhimman batutuwa da al’ummun duniya za su ci gaba da tattauna su.
Wadannan fannoni sun kunshi: batun kirkire-kirkiren kimiyya da na fasahohi, da daga martabar sashen kere-kere, da tasirin manufar fadada bukatun gida da bunkasa sayayya, da sabon ci gaba a fannin kara bude kofa, da bunkasa tashoshin cinikayya marar shinge, da fadada hadin gwiwar shiyyoyi da kasuwanni masu tasowa. (Saminu Alhassan)
