Mataimakin Shugaban ƙasa, Kashim Shettima, ya ƙaddamar da shirin “NASENI Asset Restoration Programme” domin dawo da injuna da kayayyakin gwamnati da suka lalace amma za su iya aiki, a wani mataki na farfaɗo da masana’antu da noma a Nijeriya.
A wajen bikin da aka gudanar a cibiyar aikin noma na jihar Borno, Shettima ya ce shirin zai dawo da sama da manyan injuna 26,000 da kusan rabin miliyan na sassa da akai watsi da su. Ya ce hakan zai taimaka a rage almubazzaranci da haɓaka ci gaba ta hanyar ƙirƙire-ƙirƙire a gida.
- Sojojin Sama Sun Tarwatsa Maɓoyar Ƴan Ta’adda, Ya Daƙile Hari Ranar Idi A Borno
- An Daure ‘Yan Nijeriya Uku Shekaru 15 A Bisa Laifin Zamba A Indiya
Bayan haka, Shettima ya halarci Jami’ar Jihar Borno, inda ya ƙaddamar da aikin wutar lantarki da kamfanin NDPHC ya aiwatar, wanda ya haɗa da babban tasha mai samar da ƙarfin 7.5MVA da layukan wutar lantarki masu tsawon kilomita. Ya ce lokaci ya yi da Nijeriya za ta daina watsi da dukiyar gwamnati.
Gwamnan Jihar Borno, Farfesa Babagana Zulum, ya yabawa Shettima da ƙoƙarinsa tun yana gwamna wajen samar da injunan noma 1,000 da sauran kayan aiki, yana mai cewa wannan sabuwar hanya ce ta ci gaba mai ɗorewa.
Shugaban NASENI, Khalil Suleiman Halilu, ya bayyana cewa sama da Naira Tiriliyan 14 za a kashe idan aka sayo sababbin injunan da aka iya gyarawa da kashi 15 zuwa 25 cikin dari na kuɗin. Ya ce hakan zai hana a kashe Naira Tiriliyan 10, yana mai cewa Nijeriya na da injiniyoyi da za su iya magance matsalolin da ke fuskantar ƙasa.
