Jami’an sojin sama na Operation Hadarin Daji sun yi luguden wuta ta sama a wata maboyar ‘yan bindiga wacce musamman suka kai harin akan kasurgumin dan bindiga, Gwaska Dankarami, inda suka samu nasarar kashe ‘yan bindigar 16.
Wata majiya ta ce, jami’an sun yi luguden wutar ne a maboyar ‘yan bindigar da ke daura da babban titin Kaura zuwa Namoda a karamar hukumar Zurmi a cikin jihar Zamfara.
A cewar majiyar dakarun sojin wanda suka gudanar a makon da ya wuce, Gwaska ya kasance daya daga cikin shugabannin ‘yan bindiga da hukumomin tsaro ke nema ruwa a jallo, an bayyana cewa ya tsallake tarkon da akayi masa a lokacin luguden wutar.
Wata majiyar soji ta ce, Gwaska tun bayan luguden wutar da aka yi a wani sansaninsa a ranar cika-cikin sabuwar shekara, ya jefa dan bindigar a cikin fargaba, musamman ganin yadda dakarun suka tarwatsa sansanin da yake tare da rusa sabon gidansa da ya gina a sansanin.
