Mataimakin shugaban sashen cinikin waje na ma’aikatar harkokin cinikayya ta kasar Sin He Shaojun, ya bayyana a gun taron manema labaru da ofishin watsa labaru na majalisar gudanarwar kasar Sin ya gudanar a yau Talata cewa, bisa kididdigar da hukumar kwastam ta kasar Sin ta fitar, a rabin farko na shekarar bana, yawan kayayyaki masu fasahar AI na kasar Sin da aka fitar zuwa kasashen waje ya karu sosai, cikin adadin, yawan mutum-mutumin inji na masana’antu ya karu da kaso 18.6 cikin dari bisa na makamancin lokaci na bara, kana yawan na’urorin sarrafa hajojin 3D ya karu da kashi 109.3 cikin dari, don haka kayayyaki masu fasahar AI sun kasance sabbin abubuwa masu tasiri a cinikin waje na kasar Sin.
Dalilan da suka haifar da hakan kuwa, sun hada da tushen sana’o’in kasar Sin mai kyau, da wanzar da sabunta fasahohi a kasuwa, da kara yin kirkire-kirkire a kamfanoni, da fadada bude kofa, da yin hadin gwiwa tare da sassan kasa da kasa da sauransu.
A halin yanzu, kasar Sin ta mallaki kasuwar kashe kudi mafi girma a duniya, wanda hakan ya samar da dama da dandali ga sabbin fasahohi, da sabbin kayayyaki, da kuma sabbin hidimomi.
Yawan kudin da aka yi amfani da su a fannin nazarin kimiyya da fasaha a kasar Sin ya karu, daga kashi 1.91 cikin dari a shekarar 2012, zuwa kashi 2.8 cikin dari a shekarar 2025.
Kazalika, yawan neman iznin mallakar kirkira na kasar Sin, ya ci gaba da zama a matsayin farko a duniya a shekaru 7 a jere, ciki har da kimanin kaso 60 bisa dari na dukkanin duniya masu nasaba da fasahar AI. (Zainab Zhang)
