A wannan rana za mu kawo mu ku bayani dangane da amfanin Hulba ga lafiyar dan Adam. Hulba kamar yadda muka santa, kalma ce ta Larabci, da harshen Turanci kuwa ana kiran ta da ‘Fenugreek’. Hulba wani tsiro ne mai matukar amfani ga lafiya, kuma shekaru aru-aru da su ka shude al’umma ke amfani da ita don samun waraka daga wasu matsalolin lafiya.
Jama’a na amfani da ganye da kuma kwayar Hulba wajen samar da magunguna tun a shekarun da su ka gabata. Hulba ta shahara a kasashe da dama a duniya, sai dai an fi samun ta a wasu kasashen Larabawa musamman kasar Misra, sannan ana samun Hulba a kasar Sin da kuma Indiya.
- Abin Da Ya Sa Gidauniyar NADF Da Bankin Manoma Suka Yi Haḍaka
- An Wallafa Sabon Bugun Littafin Nazari Dangane Da Tunanin Shugaba Xi Jinping Game Da Harkokin Diflomasiyya
A kasar Indiya suna kiranta da, ‘Methi’ a yaren Hindu, a yaren Telugu na Indiyan kuwa su na kiranta da ‘Menthulu’. Wani bincike da wata kafar yada labare ta yanar gizo ta wallafa, ya nuna cewa, Hulba ta shahara a kasar Indiya saboda amfaninta ga lafiya, ta yadda suke kiranta gidan kowa da akwai.
A al’adance, mutanen kasar Indiya na amfani da kwayar Hulba a matsayin wani mahadin samar da magunguna, baya ga amfani da su ke da Hulba don samar da wasu hade-hade na inganta lafiyar jiki, da kuma yadda su ke amfani da Hulba don kula da lafiyar gashi.
Sai dai, binciken zamani na kwanan nan da masana suka gudanar a kan Hulba ya nuna cewa, za ta iya samar da magunguna da hade-haden inganta lafiya daga Hulba, fiye da yadda jama’a su ka sani a baya. Daga cikin amfanin Hulba ga lafiya da masanan suka gano, harda taimaka wa ma su ciwon siga, ciwon ido, gyaran gashi da fata. Hakanan, ana amfani da Hulba kan matsalar basir, matsalolin ciki da sauran su.
