Yayin da gasar kwallon kafa ta kofin Duniya ta shekarar 2034 ke kara matsowa, kasar Saudiyya za ta dage haramcin barasa da ta shafe shekaru da dama tanayi a wurare 600 da za a kebe a fadin kasar, a wani bangare na shirinta na kawo sauyi a shekarar 2030, da nufin bunkasa harkokin yawon bude ido da zuba jari a kasar.
A cewar Daily Mail, matakin da ba a taba daukar irinsa ba, zai ba da damar sayar da wasu zababbun abubuwan sha, wato giya da cider, a wuraren da aka ba da lasisi kamar su otal-otal masu alfarma, manyan wuraren shakatawa da manyan wuraren yawon bude ido, amma kuma za a haramta shan barasa a wuraren jama’a, gidaje masu zaman kansu, shagunan sayar da kayayyaki, da wuraren taron wasanni.
- Shugaban Kasar Kenya: FOCAC Ya Samar Da Damammaki Ga Sin Da Afirka Wajen Inganta Hadin Kansu Da Samun Moriya Tare
- Mummunan Hatsarin Mota Ya Yi Sanadin Mutuwar Mutane 19 A Kogi
Wannan mataki da kasar ta dauka ya nuna karara yadda ta ke kokarin sauyawa daga ra’ayin yan mazan jiya da aka san masarautar da shi, wanda kuma ke nuna kokarin da Saudi Arabiya ke yi wajen janyo dimbin mutane masu yawon bude ido a kasar da wasu ke yiwa kallon masu tsatstsauran ra’ayi, a yayinda ta ke shirin karbar manyan wasanni na Duniya da suka hada da kofin Duniya na FIFA a 2034 da kuma Expo 2030.
A cewar jami’ai, za’a tsara yadda tsarin fitar da barasar zai kasance ta hanyar tabbatar da cewar an ba da horo ga masu sayar da ita da kuma basu takardar lasisin sayar da barasar. Hakazalika, za a tsaurara ka’idoji akan sayar da barasa a kasar, gwamnati ta jaddada cewa ana gabatar da sauye-sauyen ne cikin taka-tsantsan tare da kula da al’adun al’ummar kasar.
“Manufar ita ce, maraba da duniya ba tare da rasa asalin al’adu ba, sanya Saudiyya a matsayin mai ci gaba, duk da haka mai mutunta taswirar yawon shakatawa na duniya,” in ji hukumomin Saudiyya a cikin wata sanarwa.
Matakin ya zo ne a daidai lokacin da Saudiyya ke neman yin gogayya da kasashe makwabta kamar Hadaddiyar Daular Larabawa da Bahrain, inda a bisa ka’ida ake samun barasa a wuraren yawon bude ido.
