A cikin tsaunin Qinling-Bashan, akwai wata ma’aikaciyar gidan waya mace dauke da jakar gidan waya kore. Ta yi tafiya har fiye da kilomita dubu 180 a cikin shekaru 30 da suka wuce. Mutane mazauna yankunan karkara suna kiranta da “mai isar da sako na cikin tsaunuka”. Ita ce Zhao Mingcui wakiliyar majalisar wakilan jama’ar Sin wato NPC a takaice, kuma ma’aikaciyar kamfanin gidan waya na kasar Sin a gundumar Shiquan na birnin Ankang na lardin Shaanxi.
Wannan hanyar wasiku ta karkara, ita ce kuma “hanyar tattara ra’ayoyin jama’a” ta Zhao Mingcui. Ta kan rubuta bukatun jama’a a cikin wani littafi a kan hanyarta na aike da wasiku da kaya: Wadanne tsofaffi ke da wahalar samun magani, a wane kauye ne hanya ba ta da kyau, wane yanki ne na tsaunuka ba shi da kyakkyawar hanyar sadarwa. Wadannan ra’ayoyi daga mazauna tsaunuka sun zama shawarwarin da za ta bayar a taron majalisar NPC.
A cikin shekaru 8 da suka gabata, Zhao Mingcui ta gabatar da shawarwari sama da 80, wajen tarukan shekara-shekara na majalisar. Abubuwan da ta dade tana kula da su kamar hadewar ayyukan jigilar kayayyaki da wasiku da kwashe fasinja, sun kasance cikin muhimman ayyuka na shirin raya kasar Sin na shekaru biyar-biyar karo na 14, inda aka mai da muhimmanci kan zamanintar da kauyuka da karkara. Ma’aikatar gidan waya ta kasar Sin, a shekara ta 2024, a cikin martaninta ga shawarwarin Zhao Mingcui, ta bayyana cewa, takardun kasa kamar shirin zamanintar da aikin noma da kauyuka sun karfafa kamfanonin gidan waya da na jigilar kaya da su himmantu wajen yada ayyukansu a yankunan karkara.
A bana ita ce shekarar farko da ake aiwatar da shirin raya kasar Sin na shekaru biyar-biyar karo na 15, kuma Zhao Mingcui ta mayar da hankali kan batun kariyar samfuran abubuwan gargajiya na gida kamar su maganin da ake kira Gynostemma Pentaphyllum na gundumawar Pingli da siliki na gundumar Shiquan na Shaanxi, tana yin kira da a kara dakile jabun kayayyaki. An mika wannan shawara ga taron majalisar NPC na 2026 a hukumance, kuma a halin yanzu hukumomin da abin ya shafa suna nazarinta.
“Daga tsaunuka zuwa zauren taron jama’ar Sin, na kwashe shekaru 30 ina tafiya.” Zhao Mingcui ta ce, “Ni ce wakiliyar jama’a, na fi sanin abin da jama’a ke fata. Tabbatar da hakkin wakilan majalisar NPC ba aiki na wadannan kwanakin da aka gudanar da taron kawai ba ne, aikin kowace rana ne.”
Labarin Zhao Mingcui shi ne wani misali na tsarin dimokuradiyyar dake shafar kowa da kowa iri na Sin: dimokuradiyya tana cikin shawarwarin wannan ma’aikaciyar gidan waya, wadda ke wakiltar bukatun jama’a.
Kamar yadda ta ce: “Abin da jama’a ke fata shi ne, rayuwarsu ta kara kyau kowace rana.” An yi imanin cewa a shekaru biyar masu zuwa, za a tabbatar da karin shawarwarin wakilan majalisar NPC, kuma rayuwar jama’a za ta inganta kowace rana.(Mai zane da rubutu: MINA)
