Yau Juma’a 5 ga wata, ita ce ranar kiyaye muhalli ta duniya. A yau, ina so in ba ku labarin yadda wata ’yar kauyen Sin ke cika alkawarin kiyaye muhalli da ta yi wa abokinta dan kasar Amurka.Yin Yuzhen ‘yar kauyen Sala Wusu dake karkarar birnin Ordos na kasar Sin ce. A shekara ta 1999, ta sha alwashin cewa “zan yi iyakacin kokarin dasa bishiyoyi, don kada hamada ta kawo min wata barazana”.
Shi ya sa ta fara dasa bishiyoyi a hamadar Mu Us ta yankin Mongolia ta gida na kasar Sin. A lokacin, wani malami dan kasar Amurka mai suna Ronald Sakolsky da ke koyarwa a wata makarantar sakandare a Sin, ya ga labarin yadda Yin Yuzhen ta dukufa kan sha’anin dasa bishiyoyi don magance kwararowar hadama a Mu Us, abin da ya burge shi sosai.
Saboda haka, ya yanke shawarar taimaka mata, kuma a karshe ya tara dalar Amurka 5,000, ya ba ta. A wancan lokacin, dala 5,000 kudi ne mai yawa ga Yin Yuzhen, wanda zai iya biyan bukatun iyalinta na gina gida da kai yara makaranta, har ma da canza rayuwar dukan iyalinta. Duk da hakan, Yin Yuzhen ta yi amfani da kudin wajen sayen tsirran bishiyoyi, ta dukufa kan aikin kyautata muhallin hamada. Bisa kokarinta, wadannan bishiyoyi sun girma zuwa itatuwa sama da 50,000, kuma hamadar ta zama koren fili a yau.
Wannan labari ya burge mutane da yawa, domin aikin kare duniyarmu muradun daukacin bil’adam ne da ya wuce iyakokin kasa. Daga yanayin “hamada ta kori mutane” zuwa “bishiyoyi ta kori hamada”, alkawarin Yin Yuzhen ga Sakolsky na tsawon shekaru 27 yana gaya mana cewa, kare muhalli ba shi da iyaka, kuma ci gaban kiyaye muhalli yana bukatar hadin gwiwar al’ummun duniya. Lokacin da mutane daga kasashe daban-daban suka yi aiki tare don kiyaye muhalli, tunani na “samun jituwa tsakanin mutum da halittu” ba zai kasance mai nisa ba.
Kwanan nan, Yin Yuzhen ta yi kokarin neman Sakolsky ta yanar gizo kuma ta yi hira da shi ta hanyar bidiyo. Yin Yuzhen ta fada wa Sakolsky cewa, “Bisa gudunmawar da ka bayar, na dasa bishiyoyi. Yaushe za ka zo ka duba?” Sakolsky mai shekaru 69 ya amsa cewa, “Zan yi iyakacin kokarina, ina so in neme ki don ni ma in dasa bishiya.” Yayin da ake bikin ranar muhalli ta duniya, wannan alkawari tsakaninsu ya shaida ainihin matakin da bil’adam ke dauka na kare muhallin duniyarmu.(Mai zane da rubutu: MINA)
