Firaministan kasar Sin Li Qiang ya gana da shugaban Sabiya Aleksandar Vucic wanda ke ziyara a Sin jiya Litinin da safe a nan birnin Beijing.
Li Qiang ya bayyana cewa, a bana ake cika shekaru 10 da kafa cikakken dangantakar hadin gwiwa bisa manyan tsare-tsare tsakanin Sin da Sabiya.
Kuma bangaren Sin yana son hadin gwiwa da bangaren Sabiya ta yadda za su kasance abokan hadin gwiwa masu amincewa da juna a ko da yaushe, da goyon bayan juna kan muhimman muradunsu, da kuma ciyar da hadin gwiwa mai zurfi da karko a fannoni daban-daban zuwa gaba.
Li Qiang ya kara da cewa, bangaren Sin yana son karfafa hadin gwiwa mai hangen nesa da Sabiya, da kuma yin amfani da tsarin karfafa hadin gwiwa tsakanin Sin da sauran kasashe a bangaren tattalin arziki da ciniki da kuma rukunin bunkasa zuba jari da sauransu yadda ya kamata, don kara bayyana tasirin yarjejeniyar ciniki cikin ‘yanci tsakanin kasashen biyu, da kuma fadadawa da inganta hadin gwiwar kasuwanci da tattalin arziki tsakaninsu.
A nasa bangare, Vucic ya bayyana cewa, zuba jari da hadin gwiwar Sin sun karfafa ci gaban Sabiya sosai, kuma bangaren Sabiya yana taya bangaren Sin murnar manyan nasarorin da ya samu wajen ci gaban tattalin arziki da zamantakewar al’umma. (Amina Xu)
