Mataimakin firaministan kasar Sin He Lifeng, wanda kuma shi ne jagoran tawagar Sin a harkokin tattalin arziki da cinikayya tsakanin Sin da Amurka, ya zanta ta kafar bidiyo da yammacin jiya Alhamis tare da sakataren baitulmalin Amurka, Scott Bessent, da kuma wakilin cinikayya na Amurka, Jamieson Greer.
Bangarorin biyu sun yi musayar ra’ayoyi masu zurfi da kuma alfanu kan aiwatar da muhimmiyar matsayar da shugabannin kasashen biyu suka cimma a taron da suka yi a Busan da kuma lokacin da suka tattauna ta wayar tarho a baya, har ila yau da batun yadda za a magance abubuwan da ke ci musu tuwo a kwarya a fannin tattalin arziki da cinikayya, da kuma fadada hadin gwiwa mai amfanarwa.
Bangaren Sin ya nuna matukar damuwa game da matakan tarnaki da Amurka ta dauka kwanan nan kan kasar a fannin tattalin arziki da cinikayya.
Sai dai, duka bangarorin biyu sun amince su ci gaba da amfani da tsarin shawarwari kan tattalin arziki da cinikayya na Sin da Amurka don cimma matsaya, da magance abubuwan da suka sha bamban a kai, da kuma karfafa hadin gwiwa, ta yadda za a bunkasa ci gaban tattalin arziki da cinikayya na Sin da Amurka cikin kwanciyar hankali mai dorewa ba tare da tangarda ba. (Abdulrazaq Yahuza Jere)
Discussion about this post